Policia kontrollon lokale e makina, disa të shoqëruar në Bulqizë e Burrel
Nga OraNews Përditësimi i fundit 9 Tetor 2022, 20:30
Disa persona janë shoqeruar në polici pas kontrolleve të befasishme nga ana e tyre.
Operacionalja dhe Shqiponjat e Drejtorisë së Policisë Dibër kanë zbarkuar në lokale si dhe kanë kontrolluar makina të ndryshme.
Forcat blu po kontrollojnë për armë, drogë e persona në kërkim.
Në kuadër të këtij operacioni janë shoqëruar disa persona në Burrel e Bulqizë.
Kontrollet e befasishme ishin të mbështetur me inteligjencë informative, për goditjen e paligjshmërisë, kapjen e personave në kërkim, të atyre që qarkullojnë me armë zjarri apo shpërndajnë lëndë narkotike.
“Kontrollet nga forcat Operacionale dhe forca e Posaçme "Shqiponja" të Drejtorisë Vendore të Policisë Dibër, u mbështetën dhe nga shërbimet e Komisariateve të Policisë Mat dhe Bulqizë. Kontrolle po ushtrohen në lokale ku dyshohet se ushtrohet veprimtari e kundraligjshme e lojrave të fatit, që frekuentohen nga persona që janë në kërkim apo shpërndajnë lëndë narkotike e mbajnë armë zjarri”, njofton policia.
Kontrollet e befasishme në gjithë qarkun nga shërbimet operacionale dhe të rendit, si dhe monitorimi i akseve rrugore nga Policia Rrugore, vijojnë, me qëllim goditjen e paligjshmërive dhe rritjen e parametrave të sigurisë publike dhe asaj rrugore.
