Pas sherrit disamujor, udhëheqësit e BE-së zgjedhin Sekretaren e re të Përgjithshme të Këshillit Europian

Nga OraNews Përditësimi i fundit 7 Tetor 2022, 20:46

Bashkimi Europian e ka një ndërmjetësues të ri, që rrallëherë mund të tërheqë vëmendjen e publikut, por do të ketë fjalën në pothuajse të gjitha temat kryesore: Thérèse Blanchet.

Udhëheqësit e BE-së ranë dakord të premten në Pragë të emërojnë Blanchet si sekretaren e ardhshme të përgjithshme të Këshillit të BE-së.

Blanchet, e cila është franko-zvicerane, aktualisht drejton shërbimin ligjor të Këshillit.

Blanchet u shfaq ditët e fundit si një kandidate kompromisi për të rritur dhe ndihmuar drejtimin e të gjithë Këshillit mes grindjeve midis anëtarëve të BE-së se kush duhet të zëvendësojë Jeppe Tranholm-Mikkelsen, paraardhësin e Blanchet.

Tranholm-Mikkelsen dha dorëheqjen në mars për t'u bërë nëpunësi më i lartë civil në ministrinë e jashtme në Danimarkë, në vendin e tij.

Emri i Blanchet erdhi si një surprizë për shumë njerëz, pasi ajo nuk kishte qenë në diskutim për këtë punë para kësaj jave.

Michel e prezantoi zyrtarisht atë si kandidate të premten gjatë samitit dhe udhëheqësit më vonë nënshkruan zgjedhjen, sipas tre zyrtarëve.

Pozicioni i Sekretarit të Përgjithshëm të Këshillit të BE-së është një nga më me ndikim në Bruksel.

Sekretarja e Përgjithshme jo vetëm që merr pjesë në takimet e Këshillit Evropian të liderëve të BE-së, por ka një rol në hartimin e vendimeve të liderëve, duke i dhënë asaj ndikim në çdo dosje kyçe.

Për më tepër, Këshilli i BE-së është një nga institucionet kryesore të BE-së që ndihmon në negocimin dhe miratimin e legjislacionit.

Për muaj të tërë, vendet janë përpjekur të kapërcejnë ndarjet duke penguar emërimin e një sekretari të përgjithshëm.

Vende të shumta perëndimore dhe disa të tjera fillimisht mbështetën ambasadorin francez në BE, Philippe Léglise-Costa, si kandidatin e tyre të preferuar.

Presidenti francez Emmanuel Macron bëri presion personalisht për Léglise-Costa, por disa diplomatë nuk menduan se zyrtarët francezë ishin unanimisht pas tij.

Më vete, shumë anëtarë lindorë ishin të shqetësuar për një tjetër aleat të ngushtë të Macron që siguronte një rol kaq të lartë.

Në Këshillin Evropian, Michel konsiderohet tashmë i ngushtë me Macron dhe disa vende ishin të kujdesshme për afrimin e Këshillit të BE me Parisin.

Sakaq Blanchet, edhe pse pjesërisht franceze, ajo nuk shihet si një "person i Parisit" tha një diplomat.

Për njëfarë kohe, krahu lindor i BE-së ishte pas një tjetër ambasadori me përvojë, Matti Maasikas, si kandidat i tyre.

Maasikas shërbeu në Bruksel si ambasador i Estonisë në BE dhe tani është ambasador i BE-së në Ukrainë.

Lindorët argumentuan gjithashtu se ata ishin të nën-përfaqësuar në radhët e larta në Këshill.

Por faktori vendimtar u duk se erdhi të premten, kur, sipas disa diplomatëve, Macron vendosi të ndërrojë dhe të mbështesë Blanchet për këtë detyrë.

Blanchet është një zyrtare shumë e respektuar e BE-së, por nuk vjen nga sfondi tipik i sekretarëve të përgjithshëm të mëparshëm, të cilët shpesh kanë përvojë si ambasadorë të BE-së ose "sherpa", zyrtarë që ndihmojnë në përgatitjen e liderëve kombëtarë për punën e tyre në BE.

Disa janë të shqetësuar se Michel mbështeti Blanchet për t'i dhënë ekipit të tij më shumë kontroll mbi Këshillin e BE-së, edhe pse institucioni është menduar të punojë për shtetet anëtare.

Lëvizja "me siguri nuk do t'i shuajë dyshimet se presidenti Michel po kërkon një sekretar të përgjithshëm të dobët në mënyrë që të përpiqet të ushtrojë më shumë pushtet vetë", tha një diplomat tjetër.