Digjen ullishtet, rrezikohen shtëpitë
Nga Edi Ruçi Përditësimi i fundit 22 Shtator 2022, 17:28
Dy vatra zjarresh shkrumbuan ullishte dhe rrezikuan shtëpi të banuara në Mërgëlliç të Patosit dhe Kaninë të Vlorës. Dyshimet janë për zjarrvënie të qëllimshe, ndërsa për të vënë nën kontroll flakët u desh ndërhyrja e helikoperëve të ushtrisë.
Vapa iku me gushtin,dhe vjeshta është koha e zjarrvënieve të qëllimshme.
Këto pamje tregojnë përmasat e frikshme që mori zjarri që përfshiu kodrat me ullinj në fshatin Kaninë të Vlorës.
Të ndihmuara edhe nga era flakët që u shfaqën pas mesdites u përhapën me shpejtësi, duke përfshirë një sipërfaqe të madhe.
Qindra rrënjë ullinj, një pjesë e të cilëve dhjetëra vjeçar u shkrumbuan, ndërsa disa shtëpi pranë një prej vatrave të zjarrit u rrezikuan.
Për shkak të terrenit dhe përmasave që mori zjarri ndërhyrja nga toka ishte e pamundur, ndaj u kërkua ndihma e helikopterit të ushtrisë, që shmangu përshkallëzimin e situatës.
"Ka reaguar menjëherë dhe ka sjellë ndërhyrjen në këtë zonë kaq të rëndësishme për qytetin e Vlorës."
Por ndërsa vlerësoi punën e forcave të angazhuara në luftë me flakët, prefekti i Vlorës një thumbim e kishte për banorët e zonës që sipas tij qëndruan si spektatorë.
"Këta spektatorë që janë banorë të zonës duhet të ndërhyjnë në pronën e tyre për të dhënë dhe ata kontributin për shuarjen e zjarrit."
Më herët gjatë të enjtes, helikopteri i ushtrisë ndërhyri në një situatë e ngjashme që krijua si pasojë e një zjarri në Mërgëlliç të Patosit.
Flakët përfshinë një sipërfaqe të madhe me shkurre e ullishte, ndërsa rrezikuan banesa dhe një kabinë elektrike.
Në të njëjtën kohë, një banesë dy katëshe u dogj në lagjen "29 Marsi" në qytetin e Patosit.
Fatmirësisht dy zjarret përfunduan pa të lënduar, por nxorën në pah edhe një herë problematikat shërbimet zjarrfikëse në bashki të vogla si ajo e Patosit.
