Reagon Pici: Privilegj besimi i Ramës dhe Çuçit, dorëheqja vendim personal, jo për ndërtimet pa leje
Nga OraNews Përditësimi i fundit 15 Shtator 2022, 15:19
Pas dorëheqjes, sekretarja e Përgjithshme e Ministrisë së Brendshme, Elena Pici ka reaguar përmes mediave sociale.
Ajo ka qartësuar se nuk e ka dhënë dorëheqjen për debatet sa i përket nismës së qeverisë për konfiskimin e shtesave të pallateve dhe ndërtimeve pa leje.
Pici sqaron se e ka pasur privilegjin të ketë besimin e vazhdueshëm përgjatë dy viteve të Kryeministrit dhe atë të Sekretarit të Përgjithshëm të Ministrisë së Brendshme.
Ajo shton se vendimmarrja për zhvillimin tim të karrierës në sektorë të tjerë është krejtësisht një vendim personal dhe nuk përkon me asnjë ngjarje apo çështje tjetër sikundër është raportuar në disa media.
Pici: Pavarësisht se vlerësoj që emërimet apo lirimet e Sekretarëve të Përgjithshëm nuk duhet të përbëjnë lajm, për aq kohë sa ne jemi thjesht shërbyes publik në administratë, në kushtet e një raportimi të pavërtetë që po qarkullon në media, ndiej detyrën të sqaroj për pjesë të opinionin publik të interesuar se: Unë kam pasur privilegjin të kem besimin e vazhdueshëm përgjatë dy viteve të Kryeministrit dhe Ministrit në kryerjen e një detyre të rëndësishme publike, atë të Sekretarit të Përgjithshëm të Ministrisë së Brendshme, detyrë të cilën (përkundrejt gjithë spekulimeve mediatike, në disa raste dashakeqe në momentin e emërim tim), ndiej se e kam kryer me përgjegjshmëri të plotë, me profesionalizëm dhe integritet dhe kurdoherë e mbështetur nga ekipi i Ministrisë së Brendshme.
Për këdo që do të besojë faktet dhe jo thashethemet, vendimmarrja për zhvillimin tim të karrierës në sektorë të tjerë është krejtësisht një vendim personal dhe nuk përkon me asnjë ngjarje apo çështje tjetër sikundër është raportuar në disa media. Çdo spekulim dhe insinuatë që ngrihet, mund t’i shërbejë interesave të të tjerëve, por kurrsesi jo të vërtetës! Faleminderit!
