Humbën në Gadishullin e Karaburunit, momenti kur turistët gjermanë transportohen me skaf drejt Vlorës
Nga OraNews Përditësimi i fundit 1 Shtator 2022, 20:02
Policia ka publikuar me video, momentin kur dy turistët gjermanë të cilin kishin humbur në Karaburun, janë transportuar me skaf drejt Vlorë.
Shërbimet e Delta Forcë, në bashkëpunim me Policinë Kufitare të Vlorës, u kanë ardhur në ndihmë 2 turistëve gjermanë që kishin humbur orientimin, në Gadishullin e Karaburunit, dhe rrezikoheshin për shkak të terrenit shumë të vështirë, në këtë zonë.
Mësohet se Shërbimet e Policisë kanë nisur kërkimet, fillimisht gjatë vijës bregdetare, me mjet lundrues, dhe më pas kanë zbritur për të nisur kërkimet në tokë, në vendin e quajtur “Skaloma Bege”, në Karaburun, duke përdorur pajisje optike dhe mjete të tjera sinjalizuese policore.
Pas disa orë kërkimesh është bërë i mundur lokalizimi i dy shtetasve gjermanë, në një zonë me terren të vështirë.
Të dy turistëve gjermanë iu dha fillimisht ndihma e parë dhe më pas u transportuan me mjet lundrues në Repartin Delta Forcë, në gjendje të mirë shëndetësore.
