Takimi i fundit/ Gruaja vritet me shkop nga ish-partneri model e futbollist. E kishte denoncuar për përndjekje
Nga OraNews Përditësimi i fundit 24 Gusht 2022, 21:01
Një grua 56-vjeçare, Alessandra Matteuzzi, u vra mbrëmjen e së martës në periferi të qytetit të Bolonjës, duke e goditur me shkop dhe sende të tjera të mprehta.
Ish-partneri,Giovanni Padovani,27 vjeç, u arrestua nga policia si autor i dyshuar i krimit.
Padovani ishte denoncuar nga viktima për përndjekje më 29 korrik, por ndaj tij nuk ishte marrë asnjë masë kufizuese.
Motra: "Ajo ishte në telefon me mua dhe bërtiti për ndihmë"
Në momentin e sulmit, Alessandra ishte në telefon me motrën e saj.
“Ajo doli nga makina dhe filloi të bërtiste ‘jo Giovanni të lutem, jo të lutem, ndihmo’. Isha në telefon, thirra karabinierët që mbërritën menjëherë. Unë jetoj 30 kilometra larg saj. Në fund e rrahu për vdekje”.
Kush është Padovani
I arrestuari është një futbollist dhe ish-model, me origjinë nga Senigallia, në provincën e Ankonës.
Ai luajti në skuadra të ndryshme të Serisë C dhe D si Foligno, Troina, Giarre dhe tani Sancataldese, një ekip siçilian.
Ai do të mbërrinte në Bolonjë të martën me avion nga Siçilia dhe më pas do të shkonte të priste gruan poshtë shtëpisë.
Në fund të korrikut ai u denoncua nga gruaja për përndjekje.
Në denoncim, viktima ka raportuar për sjellje ngacmuese, telefonata të vazhdueshme, mesazhe dhe përndjekje, por jo dhunë fizike.
Ankesa për përndjekje
Në fillim të gushtit u hap një dosje në prokurori, ku hetimet iu deleguan karabinierëve.
Hetuesit nisën hetimet dhe dëgjuan disa dëshmitarë, duke dërguar një kallëzim të parë në Prokurori rreth mesit të gushtit, më pas duke nënvizuar se duhet të dëgjonin ende persona të tjerë, të cilët, megjithatë, duke pasur parasysh periudhën e pushimeve në atë kohë ishin larg Bolonjës.
Më pas Alessandra Matteuzzi kontaktoi karabinierët për të zbuluar nëse kishte ndonjë zhvillim në lidhje me këtë çështje dhe ditët e fundit ajo kishte telefonuar edhe avokatin që e asistoi për t'i thënë se burri ishte paraqitur sërish në shtëpinë e saj.
Avokati e kishte këshilluar që të integronte ankesën dhe gruaja duhet ta kishte bërë këto ditë.
Arrestimi
Padovani, i arrestuar për vrasje të rëndë me urdhër të Prokurorit Publik, sipas një rikonstruksioni fillestar, e priste jashtë shtëpisë nga ora 19.00.
Në orën 21, kur ka mbërritur 56-vjeçarja, ai e ka sulmuar dhe e ka goditur pa mëshirë edhe në kokë.
Alarmi është ngritur nga një banor në të njëjtin pallat, i cili ka dëgjuar britmat e dëshpëruara të gruas.
Kur mbërriti policia, burri ishte ende aty dhe u ndalua menjëherë. Gruaja që po vdiste ka ndërruar jetë para se të vinte ambulanca.
Klubi i futbollit: “Padovanin e kishim larguar”
Klubi nga Sancataldese, i cili luan në Serinë D, bën të ditur se Padovani ishte lënë jashtë fushës që më 20 gusht për shkak të mungesave të pajustifikuara.
