6 vite nga tërmeti në Itali që shkaktoi rreth 300 viktima, mes tyre dhe shqiptari Erjon Toro

Nga Alba Kepi Përditësimi i fundit 24 Gusht 2022, 15:28

Italia kujton sot një nga tragjeditë më të mëdha natyrore që ka prekur vendin, tërmetin e 24 gushtit 2016 i cili përfshiu 150 komuna italiane e mbi 600 persona, mes të cilëve dhe emigrantë shqiptarë.

Emigranti shqiptar Erjon Toro, baba i dy fëmijëve ishte një nga viktimat e këtij tërmeti që goditi Italinë qendrore. Prej disa vitesh familja shqiptare jetonte në Amatrice së bashku me dy fëmijët e tyre që në atë kohë ishin 5 e 3 vjeçe. Bashkëshortja e Erjonit mbeti e plagosur së bashku me fëmijët, por që fatmirësisht shpëtuan.

Italia kujton këtë event tragjik që në natën duke u gdhirë 24 gushti i 2016, shkaktoi 299 viktima, 388 të plagosur e shkatërroj komuna e banesa në rajonet Lazio, Umbria e Marche.

Në ora 3:36 min të mëngjesit të asaj dite të kobshme, një lëkundje sizmike 6.1 ballë goditi Italinë Qëndrore e shndërroj në gërmadha qytezën antike Amatrice e disa komuna pranë saj, Accumoli, Arquata del Tronto, Pecara del Tronto e Norcia.

Gjashtë vite nga kjo tragjedi Amatrice, qyteza kryesore e goditur dramatikisht nga ky tërmet, është ende një kantier i hapur. 

Raporti i fundit prezantuar nga Giovanni Legnini,  komisari i jashtëzakonshëm i emëruar nga qeveria për rindërtimin e zonave të dëmtuar nga ky event sizmik, konfirmojnë se janë ende 10 mijë kantiere ndërtimi publike e private të hapura, është përfunduar ndërtimi i 365 veprave publike e 315 të tjera ende në ndërtim e sipër. Si dhe janë rreth 22 mijë kërkesa të qytetarëve në pritje për të marrë kontributin shtetëror për rindërtimin e pronave të tyre të dëmtuara.

26 miliardë euro është dëmi ekonomik që tërmeti i 26 gushtit 2016 ka shkaktuar në Italinë qendrore e 1.9 miliardë prej tyre vetëm në komunën e Amatrices ku u regjistrua dhe numri më i madh i viktimave, 237 jetë njerëzore të humbura.

Gjatë ditës së sotme familjarët e viktimave kanë vendosur kurora me lule për të afërmit e tyre në monumentin përkujtimor, e Arqipeshkopi i Rietit, Domenico Pompilli ka mbajtur meshën e shenjtë në fushën e sportit të Amatrices.

Në ceremoninë zyrtare të kësaj dite të dhimbshme morën pjesë dhe ministrja italiane e Universitetit e Kërkimit Maria Cristina Messa.

Të pranishëm dhe lideri i Partisë Lidhja, Matteo Salvini, e deputetë të zonës nga forca të ndryshme politike.