Elina Xhengo, shqiptarja që pasqyron përulësinë dhe sakrificat e emigrantëve
Nga OraNews Përditësimi i fundit 21 Gusht 2022, 11:14
Quhet Elina Xhengo, e lindur dhe e rritur nga prindër shqiptarë e me familje shqiptare por në sportin profesionist përfaqeson Greqinë ku ka kaluar pjesën më të madhe të jetës.
Në mbrëmjen e të artës së Luiza Gegës, Xhengo fitoi të artën në hedhjen e shtizës duke e ngjyrosur edhe më shumë kuqezi qiellin e Mynihut ku po zhvillohet europiani i atletikës.
Elina ka lindur në Greqi në vitin 2002 dhe është vetëm 20-vjeç por konsiderohet e ardhmja e kësaj disipline. Prindërit emigruan shumë vite më parë dhe sot ajo konsiderohet edhe krenaria e Greqisë.
Mediat i kanë kushtuar një hapësirë të madhe ndërsa vetë atletja me përulësi shprehet se falë arritjes së saj, do të mund të largojë mamanë nga puna si pastruese pasi ajo ka sakrifikuar shumë për të deri në momentin që u shpall kampione Europe.
Shtetësinë e ka marrë vetëm pak kohë më parë pikërisht për shkak të sportit dhe sot Elina është një njeri krenar, pak rëndësi ka nëse ndihet më shumë greke apo shqiptare.
Xhengo është rekordmenia europiane përsa i përket moshës së një kampioneje. 20-vjeçarka thyen rekordin e vendosur në vitin 1962 nga Elvira Ozolina që u shpall kampione kontinenti në moshën 23-vjeçare.
