"Last move”/ Vidhte nën kërcënimin e pistoletës lodër, arrestohet 28 vjeçari në Durrës
Nga Ora News Përditësimi i fundit 22 Korrik 2022, 11:40
Një 28 vjecar ka rënë në prangat e policisë sot pasi akuzohet për disa vjedhje në qytetin e Durrësit.
I riu përdorte pistoletë lodër dhe armë të ftohta, për të vjedhur me dhunë në subjekte të ndryshme.
Ndaj Sh. Z., 28 vjeç rëndojnë akuzat e “Vjedhja me dhunë” dhe “Mbajtja pa leje e armëve të ftohta”.
"Nga veprimet hetimore ka rezultuar se ky shtetas ka vjedhur me dhunë, duke përdorur një pistoletë lodër, në dy subjekte të ndryshme, konkretisht:
Më datë 17.07.2022, në një dyqan, i ka vjedhur me dhunë shitëses, duke e kërcënuar me pistoletë lodër, shumën 45.000 lekë;
Më datë 18.07.2022, në një supermarket, i ka vjedhur me dhunë shitëses, duke e kërcënuar me pistoletë lodër, shumën 56.000 lekë," njoftoi policia.
Me finalizimin me sukses të operacionit policor "Last move" u sekuestruan në cilësinë e provës materiale dhe një pistoletë lodër dhe një armë e ftohtë (thikë).
Shërbimet e policisë bëjnë me dije se ai ka qenë i dënuar dhe më parë në këtë fushë.
Materialet procedurale i kaluan Prokurorisë, për veprime të mëtejshme.
