BE-ja i afrohet një marrëveshje kompromisi për të zbutur konfliktin me Rusinë mbi Kaliningradin
Nga OraNews Përditësimi i fundit 29 Qershor 2022, 20:50
Tregtia përmes Lituanisë në enklavën ruse të Kaliningradit mund të kthehet në normalitet brenda disa ditësh, thanë dy burime të njohura me këtë çështje, pasi zyrtarët evropianë shkojnë drejt një marrëveshjeje kompromisi me shtetin baltik për të zbutur një grindje me Moskën.
Kaliningradi, i cili kufizohet me shtetet e Bashkimit Evropian dhe mbështetet në hekurudhat dhe rrugët përmes Lituanisë për shumicën e mallrave, është mbyllur për transport mallrash nga Rusia kontinentale që nga 17 qershori nën sanksionet e vendosura nga Brukseli.
Zyrtarët evropianë janë në bisedime për përjashtimin e territorit nga sanksionet, të cilat kanë goditur mallrat industriale si çeliku deri më tani, duke hapur rrugën për një marrëveshje në fillim të korrikut, nëse Lituania, anëtare e BE-së, heq dorë nga rezervat e saj, thanë burimet, të cilët nuk pranuan të identifikoheshin për shkak të konfidencialitetit të diskutimeve.
Mosmarrëveshja për izolimin e enklavës ruse po teston vendosmërinë e Evropës për të zbatuar sanksionet e vendosura pas pushtimit të Rusisë në Ukrainë, duke nxitur frikën e një përshkallëzimi pasi kufizimet e tjera e shtynë Rusinë të mos paguajë borxhin e saj.
Ndërsa fuqitë perëndimore janë zotuar të qëndrojnë në mbrojtje të Ukrainës, duke përsëritur vendosmërinë e tyre në samitet e G7 dhe NATO-s këtë javë, po rezulton e vështirë për Evropën të qëndrojë pranë sanksioneve të rrepta dhe të shmangë përshkallëzimin e mëtejshëm me Rusinë.
Kjo është arsyeja pse zyrtarët evropianë, me mbështetjen e Gjermanisë, po kërkojnë një kompromis për të zgjidhur një nga konfliktet e tyre të shumta me Moskën, tha njëri nga burimet.
