Rrahën për vdekje grekun pas sherrit në lokalin e natës, dy shqiptarë në pranga, dëshmitarja u mori targën
Nga OraNews Përditësimi i fundit 27 Qershor 2022, 20:37
Dy shqiptarë kanë rënë në prangat e policisë greke, të dyshuar si autorë të vrasjes së 42-vjeçarit Dimitris Kordas në orët e para të së dielës (26 qershor), jashtë “Sante Rock Bar”, i cili ndodhet në sheshin qendror të Rafinës.
Ata janë dy të rinj të lindur në vitin 1998 dhe të rritur në Rafinë, Prek Predi dhe Rafael Gouma. Të dy 24-vjeçarët janë me origjinë shqiptare, por njëri ka nënshtetësi greke.
Lajmin e ka bërë të ditur ministri i Mbrojtjes Civile në një postim në Twitter, ku shkruan: “Policia greke dëshmoi edhe një herë se po vepron efektivisht me arrestimin e dy vrasësve të 42-vjeçarit në Rafina”.
Çfarë ndodhi natën fatale
Sipas asaj që raportojnë mediat në vend, nga dëshmia e dhënë në polici, gjithçka ka nisur për motive banale. Si duket, ndërsa shkonte në tualet, 42-vjeçari ka prekur një prej tyre dhe i “ka parë egër”.
Po më pas situata u qetësua dhe incidenti u konsiderua i parëndësishëm.
Por dy të arrestuarit kanë pritur që 42-vjeçari të largohej nga lokali i natës dhe e kanë sulmuar.
Goditjet e forta i shkaktuan lëndime kraniocerebrale dhe gjakderdhje të pakontrollueshme.
42-vjeçari ka qenë në gjendje të tillë sa nuk i është përgjigjur asnjë stimuli.
Në fakt personat që e njihnin thanë se nga shenjat që i lanë goditjet në fytyrë, mezi e kanë identifikuar që është ai.
Policia është njoftuar për ngjarjen në orën 02:05 të mëngjesit dhe në orën 03:10 ka qenë tashmë në Urgjencën e Spitalit “Kryqi i Kuq”.
Aty stafi mjekësor dhe infermieror vazhdoi me intubimin e tij. Por, pavarësisht se u përpoqën ta mbanin në jetë, ai ndërroi jetë nga plagët e marra.
“Është e rëndësishme që mjeku mjekësor të përcaktojë nëse goditjet në kokë janë bërë me duar apo me instrument, p.sh. një dorezë hekuri. Do të ketë diferencim në recitimin e akuzës”, tha një oficer i Sigurimit.
Dy të rinjtë, siç ka marrë vesh policia e Nëndrejtorit të Sigurimit të Atikës Verilindore, nuk i kishin shqetësuar asnjëherë organet e rendit.
"Ishte një moment i keq që rezultoi me humbjen e një jete njerëzore. Sigurisht që nuk donin të vrisnin, por tani do të përballen me akuza shumë të rënda”, tha një oficer policie që foli me dy 24-vjeçarët.
Si arritën në gjurmët e tyre
Punonjësit e policisë kanë dalë në identitetin e tyre nga targa e makinës me të cilën janë arratisur autorët, por edhe nga dëshmitë e personave në vendngjarje, pasi dy të pandehurit janë banorë të zonës dhe të gjithë i njihnin.
Në fakt, një dëshmitare okulare arriti në panik të regjistrojë targën. Kështu në më pak se 24 orë policia ka mbërritur në dyert e shtëpive të tyre.
Policia u kërkoi prindërve të 24-vjeçarëve që t'i bindnin të dilnin vullnetarisht për t'u paraqitur pranë autoriteteve.
Pak orë më pas, të rinjtë janë paraqitur në Komisariatin e Rafinës dhe më pas janë transferuar në Nën/Drejtorinë e Sigurisë së Atikës Verilindore, ku edhe po mbahen.
