Gjirokastër/ Dhunohet polici kufitar, goditet me levë në kokë, identifikohet njëri prej autorëve
Nga OraNews Përditësimi i fundit 9 Qershor 2022, 13:18
Një efektiv policie është goditur me levë në kokë në rrethana ende të paqarta. Ngjarja është shënuar në Urën e Lumit në Gjirokastër paraditen e sotme, 9 qershor 2022
Mësohet se kanë qenë 4 persona që e kanë sulmuar policin efektiv të policisë kufitare, raporton Ora News.
Nga informacionet e para flitet që polici i dhunuar i identifikuar si Sokrat Muho nga fshati Progonat i Tepelenës tre ditë më parë kishte pasur një debat me 3 persona nga Progonati i Tepelenës.
Rreth orës 12:45, në vendin e quajtur "Ura e Lumit", Gjirokastër, persona të paidentifikuar kanë goditur me sende të forta shtetasin S. M., punonjës policie i DVKM Gjirokastër, jashtë orarit të punës, i cili është transportuar në Spitalin Rajonal Gjirokastër, për të marrë ndihmën mjekësore" informoi policia.
Ndërkohë është identifikuar dhe shpallur në kërkim njëri nga autorët e dyshuar, shtetasi G. Zh.
Në vendngjarje kanë shkuar shërbimet e Policisë dhe janë ngritur pika kontrolli në hyrje dhe dalje të qytetit, me qëllim kapjen e shtetasit G. Zh., identifikimin dhe kapjen e autorëve të tjerë.
Mjekët thonë se gjëndja e tij shëndetësore është e rëndë.
