Komandanti i Mariupolit bën thirrje për evakuim të stilit të Dunkirk
Nga OraNews Përditësimi i fundit 27 Prill 2022, 17:54
Detari ukrainas i ngujuar brenda fabrikës së çelikut Azovstal të Mariupolit ka thënë se situata brenda uzinës po bëhet e rëndë pasi ai u bëri thirrje liderëve botërorë për një evakuim të stilit të Dunkirkut.
Majori Serhiy Volyna, i cili ka marrë rolin e zëdhënësit të njësisë së tij, tha se tani kishte 600 trupa të plagosur në gjendje të rëndë dhe qindra civilë nuk kishin ushqim.
Komandanti vazhdoi të bënte thirrje për një procedurë evakuimi të ngjashme me Operacionin “Dinamo” gjatë Luftës së Dytë Botërore, ku trupat aleate u shpëtuan nga plazhet e Dunkirk në Francën veriore.
Fabrika e metalit është bërë vendndodhja e qëndresës së fundit të forcave ukrainase në qytet.
Ndërsa rusët kanë thënë prej ditësh se janë në prag të marrjes së kontrollit të plotë të qytetit port, njësi nga marinsat ukrainas, si dhe batalioni Azov i ushtrisë ukrainase, i kanë mbajtur ata prapa.
