Vendimi i Orban irriton Ukrainën, kryeministri hungarez tha se ishte gati të paguante në rubla për gazin rus

Nga Amado Çela Përditësimi i fundit 7 Prill 2022, 15:25

Viktor Orban doli garant se do të paguajë gazin rus edhe në rubla, por duket se kjo nuk i ka pëlqyer Ukrainës e cila e ka quajtur Hungarinë si shkatërruese të unionit të BE-së dhe një vend jomiqësor me Kievin, duke i bërë thirrje që të pozicionohet në anën e duhur të historisë.

Qëndrimi i Hungarisë për të paguar gazin rus natyror të lëngshëm në monedhën zyrtare të Rusisë, rubla nuk i ka pëlqyer aspak Ukrainës.

Në një reagim, zëdhënësi i Ministrisë së Jashtme të Ukrainës, Olleg Nikollenko, e quajti vendimin e kryeministrit hungarez jomiqësor dhe shkatërrimtar për unitetin e Bashkimit Evropian sa i përket qëndrimit për luftën.

"Nëse Hungaria vërtetë dëshiron t’i japë fund luftës, ja çfarë duhet të bëjë: të ndalë së shkatërruari unitetin e BE-së, të mbështesë sanksionet e reja kundër Rusisë, të ofrojë mbështetje ushtarake për Ukrainën dhe të mos krijojë burime të tjera financimi për makinerinë ushtarake ruse. Kurrë nuk është vonë për të dalë në anën e duhur të historisë".

Kryeministri konservator, i cili sapo u mandatua për të katërtën herë radhazi si kreu i qeverisë së Hungarisë, tha të mërkurën se ishte i gatshëm të paguante në monedhën ruse Rubla në mënyrë që të vijonte të importonte gaz rus në vendin e tij.

Qëndrimi i Orban pason ultimatumin e presidentit Vladimir Putin, i cili iu kundërpërgjigj sanksioneve të Bashkimit Evropian.

Sipas vendimit të Kremlinit, vendet anëtare të BE-së do të duhet të paguanin në rubla nëse dëshironin të vijonin të merrnin gaz rus nga Moska.

Vendimi u kundërshtua në unison nga të gjitha vendet që janë importuese të gazit rus, por një gjë të tillë nuk e bëri qeveria hungareze e Viktor Orban.

Konservatori shprehu solidaritet për Ukrainën, por tha se populli i tij nuk duhet të vuajë për shkak të sanksioneve dhe u shpreh se nuk do të ndërpriste kontratat e gazit me Rusinë.

Rusia eksporton çdo ditë gaz natyror drejt Bashkimit Evropian përmes Ukrainës, për të cilën Kievi kërkon një embargo të plotë, e cila do të vendoset me gjasë në 11 prill.

Aktualisht sipas të dhënave më të fundit, Bashkimi Evropian i paguan mesatarisht 450 milionë dollarë Rusisë për gazin natyror që Moska eksporton në vendet e unionit.

Mbi 25% e naftës dhe gazit në vendet anëtare të Bashkimit Evropian vjen nga Rusia.