OSHEE: Në Lezhë situata u përmirësua, Nënstacioni i Bushatit të Vjetër vijon të mbetet në kushte avarie
Nga Elvis Hila Përditësimi i fundit 7 Prill 2022, 11:25
Ora 11:25 Përmes një njoftimi për median OSHEE njofton se shkak ka qenë avari e linjës së OST 110kV Bushat 2 - Lezhë,
"Në orën 03:00 të mëngjesit të sotëm është stakuar si pasojë e avarisë linja e OST 110kV Bushat 2 - Lezhë, duke lënë pa energji për 30 minuta NST Lezhë. Si pasojë e manovrimeve të OST, furnizimi me energji i qytetit të Lezhës dhe fshatrave përreth është kryer gradualisht dhe në orën 08.22 është normalizuar situata në të gjithë rajonin.
Sa i takon Nst Bushat i Vjetër, i cili vijon të mbetet në kushte avarie, OST eshte duke punuar për eleminimin e defektit, i cili ka lënë pa energji disa zona të Bushatit (Shkodër)"
Ora 08:28 Lezha në errësirë prej orës 3 të mëngjesit, defekt në nënstacionin e Dajçit
Që prej orës 03:00 të mëngjesit të sotëm, 7 prill pjesa më e madhe e Lezhës, përfshirë edhe qytetin janë përballur me mungesë të energjisë elektrike.
Nënstacioni elektrik në Lezhë nuk furnizohet me energji për shkak të një defekti në linjën e tensionit të lartë 110 kilowatt në Dajç.
Energji ka vetëm zona e Bregut të Matit që furnizohet nga nënstacioni i Rrilës.
OSHEE bën me dije se po punon për rikthimin e energjisë, ndërsa pritet që OST të riparojë defektin.
