Armando Broja: Me Spanjën luajmë për fitore. E ardhmja ime është Chelsea
Nga OraNews Përditësimi i fundit 24 Mars 2022, 13:49
Në grumbullimin me kombëtaren në Spanjë, është edhe Armando Broja. Të gjithë e themi që është ylli i kombëtares dhe sot ai foli në konferencën për shtyp ku shprehu ndjesitë e para të grumbullimit dhe si është gjendja e tij fizike.
Por dëshira e tij për të fituar është e madhe ndaj dhe sulmuesi tha se ndaj Spanjës ekipi do të luajë për fitore.
“Jemi gati fizikisht si ekip, e dimë se do të jetë ndeshje e vështirë ndaj Spanjës. Grumbullimi po shkon shumë mirë, po stërvitemi mirë. Ishalla me fitore kundër Spanjës. Do të jetë shumë e vështirë, Spanja ka ekip të fortë, por edhe ne kemi ekip të mirë. Po stërvitemi mirë, ishalla fitojmë. Forma? Jam rritur si djalë, kam mësuar te Southampton. Deri tani po më shkon shumë mirë. Të vazhdoj kështu përpara, të ndihmoj ekipin dhe të luaj më mirë për veten time. Ka qenë e vështirë të kaloja nga Vitesse te Southampton, është kapërcim i madh nga Holanda në Premier League, por kam besuar te vetja. Dua të vazhdoj përpara, e ardhmja do ketë ulje-ngritje, por dua të eci përpara duke u stërvitur mirë dhe fort. Ne futemi në fushë për të fituar ndeshjen. Kemi ekip të mirë dhe të fortë, nuk kemi frikë asnjë ekip. Miqësoret janë të mira për të marrë eksperiencë, ishalla fitojmë ndaj Spanjës”.
Më pas talenti kuqezi foli për eksperiencën te Southampton e mbi të gjitha për zërat e merkatos duke konfirmuar edhe njëherë dëshirën e tij….
“Te Southampton edhe e prisja dhe nuk e prisja ta nisja kaq mirë. E dija se ishte e vështirë në sezonin e parë në Premier League, por kam pasur besim te vetja. Me stërvitje dhe këmbë në tokë shpresoj të vazhdoj përpara. Merkato? Tani jam i fokusuar vetëm te Southamptoni, dua ta mbyll mirë sezonin. E ardhmja? Jam lojtar i Chelsea, nuk dua të shoh shumë përpara: thjesht dua të vazhdoj të luaj mirë dhe të stërvitem mirë. Për tifozët i falenderoj shumë për mbështetjen. Vazhdoni të më mbështesni mua, FSHF-në dhe ishalla me fitore kundër Spanjës. Ne kemi një grup shumë të mirë dhe trajner të mirë. Duke marrë rezultate dhe eksperiencë, mendoj se kemi një shans të mirë të futemi në Europian ose Botëror. Ishalla e arrijmë atë nivel, do ishte një gjë shumë e mirë për Shqipërinë”, dekaroi Broja në fjalën e tij nga grumbullimi me kombëtaren./Ora News/.
