Si përcaktohet çmimi tavan i karburantit. Gjoba 2 e 10 mln lekë deri në heqjen e licencës dhe përjashtimi nga APP

Nga OraNews Përditësimi i fundit 14 Mars 2022, 10:05

Publikohet në fletore zyrtare si do të caktohet çmimi tavan për shitjen për gazoilin, benzinën dhe gazin e lëngshëm të naftës.

Bordi i Transparencës dhe Kufizimit të Përkohshëm të  Çmimeve   të  Tregtimit me Shumicë/Pakicë  të  Nënprodukteve  të  Naftës  dhe Gazit  cakton çdo javë ose kur e vlerëson të nevojshme, në diskrecion të tij, çmimin tavan për shitjen për gazoilin, benzinën dhe gazin e lëngshëm të naftës.

Në rast të mosrespektimit të çmimit tavan përkatës, të vendosur nga Bordi, Shoqëritë e tregtimit me shumicë të produkteve të naftës dhe gazit dënohen me gjobë, në masën 10 (dhjetë) milionë lekë. Ndërsa shoqëritë e tregtimit me pakicë dënohen me gjobë, në masën 2 (dy) milionë lekë.

Në rast përsëritjeje, masave të mësipërme i shtohet edhe heqja e licencës së tregtimit.

Gjithashtu të gjitha shoqëritë, që tregtojnë me shumicë apo pakicë produktet dhe nënproduktet e naftës dhe gazit, janë të detyruara të marrin masa për mbajtjen e rezervave përkatëse.

Mosmarrja e masave nga shoqëritë private dënohet sipas legjislacionit të fushës dhe këto shoqëri përjashtohen nga procedurat e prokurimit publik për një periudhë 3-vjeçare nga Agjencia e Prokurimit Publik.

Kush vendos gjobën?

Të drejtën e dhënies së masave administrative me gjobë, e ka Inspektorati Shtetëror i Mbikëqyrjes së Tregut.

Si përcaktohet çmimi?

Bordi i Transparencës dhe Kufizimit të Përkohshëm të  Çmimeve   të  Tregtimit me Shumicë/Pakicë  të  Nënprodukteve  të  Naftës  dhe Gazit  cakton çdo javë ose kur e vlerëson të nevojshme, në diskrecion të tij, çmimin tavan për shitjen për gazoilin, benzinën dhe gazin e lëngshëm të naftës, sipas metodologjisë së mëposhtme:

a) Çmimi i shpallur nga bursa në Platts i një dite më parë nga mbledhja e Bordit, në kushtet CIF

Med, për gazoilin, e standardit SSH EN 590 2018, benzinën e standardit SSH EN 228 2018 dhe gazin

e lëngshëm të naftës përkatësisht propan, butan dhe përzierjen e tyre;

b) Çmimit të përcaktuar në shkronjën “a”, të këtij neni, i shtohet një vlerë premio prej 20

USD/ton;

c) Për shoqëritë e tregtimit me shumicë lejohet një shtesë jo më shumë se 1 % mbi çmimin e

përllogaritur, sipas shkronjave “a” dhe “b”, të këtij neni, në të cilin aplikohen edhe taksat e tarifat, sipas

legjislacionit në fuqi;

ç) Për shoqëritë e tregtimit me pakicë lejohet një shtesë jo më shumë se 5% mbi çmimin e

përllogaritur, sipas shkronjave “a” dhe “b”, të këtij neni, në të cilin aplikohen edhe taksat e tarifat, sipas

legjislacionit në fuqi.

Përbërja e bordit?

 Në rastin  e  situatave  të  veçanta  ngrihet dhe funksionon Bordi i Transparencës dhe Kufizimit të Përkohshëm    të    Çmimeve    të    Tregtimit    me Shumicë/Pakicë  të  Nënprodukteve  të  Naftës  dhe Gazit

2. Bordi ka në përbërje:
a)   ministrin   përgjegjës   për   ekonominë,   në cilësinë e kryetarit;
b) ministrin përgjegjës për hidrokarburet;
c) Drejtorin e Përgjithshëm të Tatimeve;
ç)  Drejtorin e Përgjithshëm të Doganave;d)
5 përfaqësues nga shoqëritë e hidrokarbureve,  ndër  të  cilët  3  përfaqësues  nga shoqëritë e tregtimit me shumicë dhe 2 përfaqësues të tregtimit me pakicë  të hidrokarbureve;
dh)  2  përfaqësues  nga  ministria  përgjegjëse  për hidrokarburet, në nivel drejtuesi;
e)  1  përfaqësues  nga  ministria  përgjegjëse  për financat, në nivel drejtuesi të lartë.

Mbledhja e bordit mund të bëhet edhe online.  Bordi  mund  të  ftojë  të  marrin  pjesë  në mbledhjet   e   tij   edhe   përfaqësues   të   tjerë   nga institucione   shtetërore,   ekspertë   të   fushës   apo grupe interesi.

“Albpetrol”, sh.a. me qëllim përmirësimin e situatës me furnizim të hidrokarbureve, ka të drejtë të hyjë në marrëveshje direkte me shoqëri private ose publike.

Fletorja zyrtare e dates Nr. 40, 14 mars 2022