Pentagoni: Nuk ka rrjedhje të materialit radioaktiv nga sulmi rus në termocentralin bërthamor
Nga OraNews Përditësimi i fundit 4 Mars 2022, 21:28
Nuk ka pasur asnjë rrjedhje të materialit radioaktiv nga termocentrali bërthamor i Zaporizhzhia që u sulmua nga forcat ruse, tha zëdhënësi i Pentagonit, John Kirby, gjatë një konference në Pentagon të premten.
Pentagoni nuk mund të flasë se në çfarë statusi funksional është termocentrali tani ose nëse rusët kanë kontrollin e termocentralit, tha Kirby.
Ndërkohë bëhet me dije se Departamenti i Mbrojtjes po ndihmon Departamentin e Energjisë në reagimin e SHBA ndaj incidentit.
"Për shkak se ne kemi përvojë në drejtimin e termocentraleve bërthamore në Departamentin e Mbrojtjes, ne jemi pjesë e asaj përpjekjeje duke ofruar disa këshilla për Departamentin e Energjisë," tha Kirby.
Kirby e quajti sulmin tepër të rrezikshëm, që mund të kishte shkaktuar shumë edhe për vendet fqinje.
“Sulmimi i një centrali bërthamor është jashtëzakonisht i rrezikshëm dhe mund të kishte shkaktuar shumë më tepër dëme dhe shkatërrim për popullin e Ukrainës dhe ndoshta edhe për vendet fqinje, nëse kjo do të kishte shkuar në një mënyrë tjetër,” tha ai.
