7 orë bisedime Rusi-Ukrainë, evidentohen disa pika të përbashkëta. Beteja në Kiev vazhdon
Nga OraNews Përditësimi i fundit 28 Shkurt 2022, 19:04
Pas pesë ditë luftimesh Delegacionet nga Kievi dhe Moska kanë zhvilluar diskutime në kufirin Ukrainë-Bjellorusi paraditen e 28 shkurtit, me qëllim gjetjen e një marrëveshjeje për të ndaluar luftimet në Ukrainë.
Takimi mes palëve ka zgjatur më shumë se 7 orë. Edhe pse për mediet janë dhënë shumë pak detaje, palët kanë folur për shpresë në uljen e armëve.
Nga kryenegociatori rus, Vladimir Medinsky është bërë me dije se janë identifikuar disa pika në të cilat mund të gjendet gjuha e përbashkët.
Pas bisedimeve të para, palët janë tërhequr për të zhvilluar konsultime me drejtuesit më të lartë të vendeve, duke e lënë të hapur rikthimin e bisedimeve një kohë të shkurtër.
Madje raundi i ardhshëm pritet të mbahet në kufirin midis Bjellorusisë dhe Polonisë.
Ukraina e cila prej mëngjesit të 24 shkurtit po lufton më forcat ruse, kërkon armëpushim dhe tërheqje nga pala kundërshtare, ndërsa Kremlini këmbëngul në pavarësinë e dy rajoneve, por dhe qëndrimin e Kievit si një shtet neutral pa u bërë pjesë e NATOS.
Pavarësisht ndarjes në këto llogore duket se palët kanë gjetur pika të përbashkëta, të cilat së pari duhet të konfirmohen nga presidenti.
Edhe për zëdhënësin e presidentit Putin, Dimitri Peskov sa më shumë kohë të kalojë aq më shumë njerëz vriten.
