Ukraina 24 orë nën pushtimin e Rusisë, shpërthime të shumta mbi Kiev dhe 137 viktima
Nga OraNews Përditësimi i fundit 25 Shkurt 2022, 08:00
Është dita e dytë e pushtimit rus të Ukrainës - lufta e parë e madhe tokësore në Evropë në dekada.
Presidenti ukrainas Volodymyr Zelensky sapo mbajti një fjalim kombëtar ku konfirmoi se sulme të shumta ruse goditën kryeqytetin Kiev dhe pjesë të tjera të vendit herët të premten në mëngjes.
Ne kemi parë pamjet dhe imazhet e shpërthimeve dhe ndërtesave të dëmtuara në Kiev, ku jetojnë 2.8 milionë njerëz. Banorët u zgjuan nga sirenat e sulmit ajror dhe u është thënë të strehohen në bunkerë.
Rusia po intensifikon sulmin e saj në kryeqytetin ukrainas, pas përparimeve në qytetet ukrainase në lindje, veri dhe jug.
Ukraina thotë se të paktën 137 civilë dhe ushtarë u vranë dje - ditën e parë të pushtimit.
Midis tyre ishin 13 roje ukrainase që vdiqën duke mbrojtur një territor të vogël - Ishulli i Gjarpërinjve - në Detin e Zi.
Një betejë ndodhi në zonën bërthamore të Çernobilit në veri, e cila ra në duart e forcave ruse. SHBA thotë se ushtarët ukrainas po mbahen peng atje.
BE, Australia dhe Japonia zbuluan sanksione të reja të premten që synojnë bankat, kompanitë dhe oligarkët rusë. Vendet perëndimore kanë premtuar gjithashtu ndihmë dhe furnizime ushtarake për forcat ukrainase.
Presidenti francez Emmanuel Macron tha se ai i telefonoi Vladimir Putin duke i kërkuar që t'i jepte fund sulmit dhe telefonata ishte "e sinqertë, e drejtpërdrejtë, e shpejtë".
Por Zelensky vuri në pikëpyetje fuqinë e sanksioneve perëndimore në fjalimin e tij këtë mëngjes duke thënë, "si dje, forcat më të fuqishme në botë po shikojnë nga larg".
