"Vjen era vjedhje", Basha: Një amvisë sheh tre dyqane për një tenxhere, qeveria 17 procedura brenda ditës për incineratorët
Nga OraNews Përditësimi i fundit 20 Shkurt 2022, 12:52
Gjetjet e hetimit të Komisionit të drejtuar nga PD lidhur me aferën e incineratorëve nxori sërish në konferencë për mediat kryedemokratin Lulzim Basha.
Ai deklaroi se qeveria ka bërë 17 procedura shtetërore për incineratorët duke dhënë 23 mln euro pagesa paradhënie.
Basha deklaron se të gjitha këto procedura nuk kanë mundësi të jenë bërë pa dijeninë dhe miratimin e kryeministrit Edi Rama.
Basha: Në një takim me punëdhënës, mu kujtua gjatë bashkëbisedimit, një kompani private, hap tender, merr 3 oferta përpara se të vendosë fituesin. Por edhe një kryefamiljar, përpara se të vendosë ku të blejë tulla dhe llaçin shikon 2-3 vende se kush i ka më lirë. Dhe një amvisë në shtëpi, sheh dy tre dyqane për të blerë tenxhere për të parë se ku janë më lirë. Këta me paratë tuaja brenda një dite kanë bërë 17 akte shtetërore. Që për t’i dhënë një letër zyrtare të vërdallisin nja një javë; Këta për një ditë kanë bërë 17 akte zyrtaere. Kanë hapur ofertën, përcaktuan fituesin dhe bënë gati paratë.
Dhanë 23 mln euro paradhënie vetëm me një ofertues, me zero përvojë. Tani e shohim njëri-tjetrin përmes ekranit dhe e dëgjojmë dhe tashmë ekrani nuk ofron mundësinë e nuhatjes. Kur dëgjoni këtë fakte, çfarë ere ju vjen, çfarë ere e qelbur ju vjen. Për një copë letër ju vërdallisin, për një ditë kalojnë 17 akte zyrtare pa një garanci. Shpallin fituesin brenda një dite kur është bërë oferta. Japin 23 mln euro nga paratë tuaja.
