Rama tregon për VOA se çfarë diskutoi me sekretarin Blinken
Nga OraNews Përditësimi i fundit 15 Shkurt 2022, 20:38
Kryeministri i Shqipërisë, Edi Rama ndodhet në SHBA. Pasditen e sotme, ai u takua me sekretarin amerikan të shtetit Antony Blinken.
Kryeministri në një intervistë për Zërin e Amerikës tregoi se çfarë u diskutua gjatë takimit me sekretarin Blinken.
Rama: Diskutuam lidhur me bashkëpunimin në Këshillin e Sigurimit, marrëdhëniet bilaterale, padiskutim lidhur me rajonin, me ecurinë e reformave në Shqipëri dhe në tërësi prekëm të gjitha temat që janë të rëndësishme në këtë marrëdhënie.
VOA: SHBA dhe Shqipëria ranë dakord të bashkëpunojnë në Këshillin e sigurimit. Për çfarë bashkëpunimi bëhet fjalë dhe çfarë roli do të luajë Shqipëria në Këshillin e sigurimit?
Rama: Ky është një proces i njohur në traditën e Këshillit të Sigurimit ku dy vende bëhen bashkë për të adresuar 1 apo disa dosje të caktuara. SHBA na e propozuan ne këtë bashkim, ne e pranuam me shumë kënaqësi dhe përgjegjësi dhe kjo na jep përgjegjësinë që në Këshillin e Sigurimit të luajmë një rol të veçantë.
Tensionet Rusi-Ukrainë
VOA: A do të dalë Shqipëria me rezolutë për Ukrainën?
Rama: Kjo nuk është një çështje e Shqipërisë, është tashmë një çështje e gjithë botës. Patjetër që në këtë proces ne do të jemi krah për krah me SHBA. Vendimmarrja i takon SHBA.
VOA: A ka qytetarë Shqiptarë në Ukrainë dhe a janë larguar.
Rama: Ministria për Evropën dhe punët e Jashtme ka marrë të gjitha masat e nevojshme. Ne kemi disa qytetarë shqiptarë që janë pjesë e misionit të monitorimit të OSBE që do të vazhdojë të qëndrojnë atje.
