Rritet interesi për vaksinën anticovid, mjekët: Janë shtuar injektimet te grupmoshat e reja
Nga OraNews Përditësimi i fundit 15 Shkurt 2022, 19:51
Ritmet e vaksinimit u ulën ndjeshëm gjatë janarit kur Shqipëria kaloi valën e radhës së covid-19.
Mjekët thonë se ditët e fundit është rikthyer interesi i qytetarëve për të marrë injeksionin kundër covid-19.
Në Qendrën Shëndetësore numër 10 në kryeqytet çdo ditë vaksinohen mesatarisht 150 persona.
"Janë ulur shumë ndjeshëm shenjat e virozës dhe numri i të infektuarve dhe shohim një rritje shumë të lartë të pacientëve që janë të interesuar për të kryer dozën e parë, dozën e dytë dhe të tretë."
Aktualisht po përdoret vaksina e kompanisë Pfizer.
Të rinjtë edhe pse dyshues në fillim kanë nisur të vaksinohen.
Mjekja Jonida Diko tregon se interes ka pasur edhe në grupmoshën 12-16 vjeç.
"Kemi një rritje të kërkesës të moshës 16+ dhe 18+ që janë interesuar për të kryer vaksinën për herë të parë. Grupmosha 16+ vjen e shoqëruar bashkë me prindërit dhe dëshirën për ta kryer këtë vaksinë."
Pavarësisht se infektimet kanë rënë dhe “ Omicron” shkakton simptoma të lehta mjekët bëjnë thirrje për vaksinim.
"Shohim që më me vështirësi po e kalojnë pacientët e pavaksinuar. Me simptoma më të shprehura po e kalojnë më vështirë sëmundjen."
Sipas të dhënave të autoriteteve shëndetësore rreth 41% e popullsisë është vaksinuar me të dyja dozat ndërsa dozën përforcuese e kanë marrë vetëm 7.8% e popullsisë.
