Ngrica, reshje dëbore e temperatura -4°C , si parashikohet moti për sot
Nga OraNews Përditësimi i fundit 24 Dhjetor 2021, 07:42
Vendi ynë paraqitet me alternime kthjellimesh dhe vranësirash ku vranësira më të dendura do të ketë në veri dhe qendër të territorit duke rrezikuar reshje të pakta shiu e dëbore.
Sipas MeteoAlb, orët vijuese, mbeten në ndikimin e kthjellimeve dhe vranësirave të shpeshta në të gjithë territorin e vendit, situatë e cila do të vijojë deri mëngjesin e së shtunës.
Temperaturat e ajrit do të rriten ndjeshëm në mëngjes dhe në mesditë duke luhatur vlerat ditore nga -4°C deri në 16°C.
Era do të fryjë mesatarisht me shpejtësi 40 km/h nga drejtimi verior dhe veriperënidmor duke krijuar në brigjet detare dallgëzim 2 ballë.
Rajoni dhe Europa
Prezenca e një qendre të fuqishme ciklonare në brigjet veriperëndimore me ndikim deri në qendër të kontinentit do të diktojë mot të paqëndrueshëm në këto rajone ku reshjet e shiut dhe dëborës do të jenë dominane.
Në Britaninë e Madhe priten edhe erëra të forta. Reshje të pakta dëbore do të ketë pjesërisht ne rajonin e Ballkanit, ndërsa Europa Veriore dhe vendet e Lindjes paraqiten në ndikimin e motit të kthjellet dhe temperaturave ekstremisht të ulëta ku termometri do të zbresë deri në – 14 gradë C.
