Gjashtë ambasadorë takojnë Bashën për një orë, një ditë pas rikthimit të Berishës
Nga OraNews Përditësimi i fundit 14 Dhjetor 2021, 10:07
Ka zgjatur më shumë se një orë takimi i 6 ambasadorëve të akredituar në Tiranë me Lulzim Bashë në selinë PD.
Takimi i nisur rreth orës 10:00 ka përfunduar rreth orës 11.10 minuta.
Asnjëri prej ambasadorëve as vetë Basha nuk dha një prononcim për median pas këtij takimi, një traditë e zakonshme kjo në herë të tjera.
Përplasja në PD
Takimi vjen një ditë pasi në selinë e PD-së ish kryeministri Sali Berisha së bashku me anëtarët e tjerë të Komisionit për Rithemelimin e Partisë Demokratike, strukturë e ngritur nga Kuvendi I 11 dhjetorit hynë në selinë e PD-së për të zhvilluar një mbledhje. Përballë në një sallë tjetër, Lulzim Basha po zhvillonte një takim tjetër.
Berisha njoftoi nisjen e përgatitjeve për referendumin e datës 18 dhjetor, ku kërkohet që anëtarësia e partisë të shprehet për vendimin e Kuvendit për shkarkimin e zotit Basha.
Nga ana tjetër Basha reagoi me tonet më të ashpra të përdorura deri më tani ndaj pararendësit të tij, duke i kujtuar të kaluarën komuniste, apo dhe ngjarjet e vitit 1997.
6 ambasadorët
Në takimin e sotëm me Bashën kanë qenë ambasadorja e SHBA-së, Yuri Kim, ambasadori i BE-së Luigi Soreca, ambasadori i Gjermanisë, Peter Zingraf, ambasadorja e Francës, Elisabeth Barsacq, ambasadori i Britanisë, King-Smith dhe ambasadori i Italisë, Fabrizio Bucci.
Ende nuk ka një njoftim mbi takimin e sotëm ndërkohë Basha nga ana tjetër ka nisur përgatitjet për Kuvendin e 18 dhjetorit.
