U konfliktuan në market, Ora News zbardh detaje nga vrasja në Tiranë, viktima dhe shoku në gjendje të dehur...
Nga Edison Vatnikaj Përditësimi i fundit 14 Dhjetor 2021, 08:05
Ora News zbardh detaje të reja nga konflikti me armë zjarri në Tiranë që i kushtoi jetën shtetasit Jurgen Duka (Mëziri). Ngjarja ndodhi pak pas mesnate në rrugën "Irfan Tomini".
Shtetasi Jurgen Duka (Mëziri), dyshohet se në gjendje të dehur, së bashku me shokun e tij shtetasin O. D., kanë hyrë në marketin që shikoni në foto dhe pas një debati ka filluar një konflikt me një shtetas tjetër të pa identifikuar.
Shtetasi i paidentifikuar ka qëlluar me armë zjarri ku ka mbetur i plagosur Jurgen Duka, i cili më vonë ka ndërruar jetë në Spitalin e Traumës.
Nga verifikimet e kryera rezulton se viktima është person me precedent të mëparshëm kriminal për veprën penale "Falsifikimi i monedhave" ku në vitin 2016 Gjykata e Apelit Tiranë për këtë vepër e ka dënuar me 8 muaj burg; për veprat penale "Heqja e paligjshme e lirisë" dhe "Përndjekja" në vitin 2017 ku është dënuar me 4 muaj burg.
Gjithashtu ky shtetas, në vitin 2013 është proceduar për veprën penale "Mashtrimi" dhe në vitin 2014 është proceduar për "Mosbindje ndaj urdhrit të punonjësit të policisë".
Shërbimet e Policisë kanë kaluar menjëherë në vendngjarje, dhe grupi hetimor, nën drejtimin e Prokurorisë ka sekuestruar prova materiale që shërbejnë për të identifikuar autorin e ngjarjes.
Janë marrë në pyetje shoku i viktimës dhe persona të tjerë në vendngjarje. Nga ana e policisë vijon puna për identifikimin e kapjen e autorit.
