Balla: Autoritetet në terren, prurjet më të mëdha të Vjosës në 50 vite, do të evakuojmë banorët
Nga OraNews Përditësimi i fundit 12 Dhjetor 2021, 13:23
Për të monitoruar situatë me përmbytjen në qytetin e Fierit ka dalë në terren edhe drejtuesi Politik i Partisë Socialiste për Qarkun e Fierit Taulant Balla.
Ai ishte i pranishëm sot pranë lumit të Vjosës në urën e Mifolit, për të parë nga afër situatën dhe u shpreh se situata paraqitet e vështirë dhe se janë prurjet më të mëdha në 50 vite.
Balla: Drejtoria e Përgjithshme e Emergjencave Civile, Prefektura dhe Bashkia e Fierit kanë njoftuar dy tre ditë para situatën emergjente që parashikohej. Ashtu siç e tha edhe z. Çako është prurja më e madhe në 50 vjet, edhe në vitin 2017 kur kishte përmbytje ura e Mifolit nuk u kalua nga ujërat. Kemi një situatë të vështirë, por unë doja t’ju thosha që shpresojmë që në orët në vijim niveli i ujërave të bjeri. Kemi biseduar me forcat e ushtrisë dhe nëse niveli i ujërave nuk do të bjerë, ne do të bëjë evakuime me forcë të atyre personave që vazhdojnë të qëndrojnë në banesa. Jo se ka një rrezik aktualisht, por ajo që është detyra jonë primare në çdo situatë emergjente është jeta e banorëve. Disa prej shqetësimeve që kemi marrë dhe nga banorët janë pjesa e blegtorisë së tyre, qofshin bagëti, qofshin ferma të cilat dhe me mbështetjen e forcave të ushtrisë ne do mundohemi t’i nxjerrim nga zona e rrezikut.
Balla shtoi se do të riforcohen të gjitha barrierat mbrojtëse të pjesës së argjinaturave dhe theksoi se prurjet e lumit Vjosa janë të paparashikueshme.
Balla: Më pas do të riforcojmë të gjitha barrierat mbrojtëse të pjesës së argjinaturave. Dua ta theksoj që investimet në këto 4 vite janë duke e treguar efektivitetin e tyre sot. Të gjithë e dimë që prurjet e lumit Vjosa janë të paparashikueshme dhe ka nivelin e vet të rrezikut. Punët që janë bërë deri tani e dhanë efektin dhe shpresoj që rreth orës 16 të kemi një lajm më të mirë për një ulje të nivelit të ujit në Urën e Mifolit.
