"Bashkim sa më të shpejtë", qindra shqiptarë nga Kosova në Vlorë për Festën e Flamurit
Nga OraNews Përditësimi i fundit 27 Nëntor 2021, 15:58
Në vigjilje të festive të nëntorit, qindra shqiptarë të Kosovës i janë drejtuar të shtunën vendit tonë. Në pikën kufitare të morinës në Kukës, që nga orët e para të mëngjesit qytetarët kanë kaluar doganën me procedura të përshpejtuara sipas vendimit të dy qeverive.
Me makina e autobusë, qindra shqiptarë të Kosovës janë nisur që nga mëngjesi i së shtunës drejt Shqipërisë.
Në vigjilje të 28-29 nëntorit, me familje e shoqëri ata planifikojnë që të kalojnë festat në shtetin amë.
Vlora e flamurit është destiancioni kryesor i tyre.
"Vlorë, për të festuar festën kombëtare."
"Në Vlorë, për festa."
Por edhe qytetet e tjera të vendit do të presin bashkëkombësit.
"Në Tiranë, për pushime."
"Në Tiranë për festën e 28 Nëntorit, ditën e Flamurit."
"Për festë jam duke shkuar."
Siç edhe u premtua në mbledhjen e dy qeverive në Elbasan, procedurat e kalimit për festa ishin të përshpejtuara.
"Fare, vetëm sa u futëm."
"As 2 minuta nuk pritëm."
Për festën e Flamurit Kuq e Zi kanë një dëshirë, dhe një urim.
"Rroftë Pavarësia, ishalla bashkim sa më të shpejtë."
"Për ne Shqipëria dhe Kosova janë një."
Sa i takon masave anticovid ato mbeten në fuqi, ku qytetarët duhet të paraqesin ose pasaportën e vaksinimit, testin negativ që të jetë kryer në 72 orët e fundit, ose dëshmi që e kanë kaluar Covid në 6 muajt e fundit.
