Pogradec, në kërkim pronari i firmës së turshive, ja çfarë i gjetën Policia dhe Tatimet në biznes
Nga OraNews Përditësimi i fundit 11 Nëntor 2021, 10:18
Pronari i firmës Rives në Pogradec, e cila merret me përpunim dhe konservim të produkteve ushqimore është shpallur në kërkim nga policia.
Spiro Fuqi akuzohet për punësim të paligjshëm dhe mashtrim me produkte ushqimore.
Shpallja në kërkim e Fuqit u bë pas kontrollit të ushtruar nga AKU dhe Tatimet në orën 09:00 të mëngjësit, 10 nëntor, në subjektin në pronësi të tij në lagjen numër 1 në Pogradec.
"Janë gjetur 2 punonjëse të cilat pas veriofikimit ka rezultuar se nuk ishin regjistuar në organet kompetente, sigurimet shëndetësore dhe shoqërore" njofton policia.
Po kështu gjatë kontrollit të ambjentit u gjetën dhe sekuestruan 136 etiketa të subjektit Bean Dish dhe disa vazo të mbushura dhe të mbyllura me fasule të përpunuara, ku rezulton se këto etiketa të mbushura i përkasin subjektit Natural Trade.
Operacioni u ndërmor në bashkëpunim me sektorin e monitorimit dhe hetimit ushqimor.
Policia thotë se ka kontaktuar me Spiro Fuqin, i cili ka thënë se ndodhet në Tiranë.
