Miratim prindëror për "Facebook"/ Rrjetet sociale duhet të kërkojnë leje për fëmijët nën 16 vjeç
Nga OraNews Përditësimi i fundit 26 Tetor 2021, 10:21
Australia pritet të ashpërsojë kuadrin ligjor për rrjetet sociale, si Facebook, që t'ua lë prindërve në dorë vendimin që ato të përdorin nga fëmijët minorenë.
Sipas projektligjit që u bë i njohur të hënën, nëse platformat sociale lejojnë fëmijët nën 16 vjeç pa i verifikuar dhe pa miratimin e prindit, mund të gjobiten me 10 milionë dollarë australianë.
Synimi i ligjit është të mbrojë të rinjtë nga stresi dhe shëndetin mendor, dhe të mos ekspozojë të dhënat e tyre private për qëllime reklamash.
Propozimet e fundit vijnë pasi ish-menaxherja e Facebook-ut, Frensis Hougen, denoncoi faktin se gjiganti amerikan sheh më shumë përfitimet financiare sesa të mirën publike.
Hougen u paraqit një ditë më parë përpara parlamentit britanik për të folur për ligjin për sigurinë në internet dhe rreziqet që u kanosin fëmijëve aplikacionet si Instagram-i.
"Kam shumë frikë që Instagram-i mund të mos bëhet dot një program i sigurt për 14-vjeçarët dhe sinqerisht kam dyshime për sigurinë e një 10-vjeçari.”
Australia është ndër vendet që ka kërkuar një rregullore ndërkombëtare për internetin dhe u ka shpallur sfida ligjore kompanive të mëdha si Google apo Facebook.
