Maqedoni e Veriut/ Partitë shpallin fitoren, shumë komuna do të shkojnë në balotazh
Nga OraNews Përditësimi i fundit 18 Tetor 2021, 10:41
Opozita maqedonase ka shpallur fitoren në zgjedhjet lokale të fundjavës, edhe pse kryeministri Zoran Zaev thotë se rezultatet përfundimtare do nxjerrin fitues LSDM-në dhe aleatët e tij.
Votimet u mbyllën të dielën në orën 19:30, gjysmë orë më vonë se plani për shkak të problemeve teknike me aplikimin për herë të parë të aparateve biometrike për identifikimin e votuesve.
Rreth 49% e qytetarëve me të drejtë vote e ushtruan vullnetin për 80 kryetarët dhe kuvendet komunale.
Partia maqedonase, VMRO-DPMNE-ja, e priti triumfalisht rezultatin paraprak dhe shpalli fitoren në 20 prej komunave që në raundin e parë.
"Sot është ditë e madhe, një ditë historike për Maqedoninë dhe për VMRO-në. Ka lindur shpresa te çdo maqedonas," tha kryetari i opozitës, Hristjan Mickoski.
Fitoren në 20 komuna e pretenduan edhe socialdemokratët në pushtet të kryeministrit Zaev.
"Jam i bindur se do të kemi më shumë kryetarë komunash se VMRO-DPMNE-ja, prandaj nuk kemi pse të shkojmë në zgjedhje të parakohshme. Udhëheqim bindshëm në mbi 36 komuna dhe në Qytetin e Shkupit. Raundi i dytë çdo gjë do e ndryshojë në favorin tonë."
Nga partitë shqiptare, lideri i Bashkimit Demokratik për Integrim, Ali Ahmeti, shpalli fitoren e BDI-së në tri komuna.
Kryetari i Lëvizjes Besa, Bilal Kasami, tha se në raundin e dytë ai do të fitojë Tetovën, ndërsa kryetari i Partisë Aleanca për Shqiptarët, Ziadin Sela, shprehu bindjen për marrjen e dy komunave urbane të Gostivarit e Dibrës.
Komisioni Shtetëror i Zgjedhjeve i konsideroi zgjedhjet në Maqedoninë e Veriut, të rregullta dhe të suksesshme.
Ministria e Punëve të Brendshme informoi për disa parregullsi dhe tentativa për blerje votash të cilat i kanë kaluar për shqyrtim prokurorisë publike.
