Denoncimi i Shehajt: Rama po prish portin e mallrave në Vlorë, tokën po u fal ortakëve të tij

Nga OraNews Përditësimi i fundit 2 Tetor 2021, 20:05

Deputeti demokrat Angron Shehaj përmes një postimi ka denoncuar atë që e ka quajtur si afera korruptive me portin e Vlorës.

Ai shkruan në Facebook se qeveria po prish portin e mallrave në Vlorë sepse tokën ku ndodhet porti do t’ia falë ortakëve të Kryeministrit për të ndërtuar aty kulla dhe një port turistik jahtesh.

Sipas Shehajt, koncesionarëve të portit turistik do t’u jepet 50 mijë metër tokë shtetërore falas në vendin ku sot është porti tregtar.

Shehaj: Mandati i tretë i Edi Ramës po nis ashtu siç përfunduan dy të parët. Me koncesione për klientët e qeverisë, që paguhen shtrenjtë nga qytetarët dhe tjetërsim të pronës publike. Afera e radhës është në Vlorë, përmes një skeme absurde, pa logjikë ekonomike dhe qartazi korruptive. Qeveria po prish portin e mallrave në Vlorë sepse tokën ku ndodhet porti do t’ia falë ortakëve të Kryeministrit për të ndërtuar aty kulla dhe një port turistik jahtesh. Por meqë porti i mallrave po prishet, qeveria do ta ndërtojë me koncesion duke e zhvendosur në zonën e Triportit.

Por sa do paguajnë qytetarët shqiptarë për këtë aferë të qeverisë? E para koncesionarëve të portit turistik do t’u jepet 50 mijë metër tokë shtetërore FALAS në vendin ku sot është porti tregtar. E dyta, qytetarët shqiptarë do të paguajnë një vlere e parashikuar prej 60 milionë euro për të ndërtuar portin e ri tregtar në Triport. Pra privatët do të ndërtojnë kulla dhe portin turistik mbi tokë të falur publike në një nga vendet më të mira të Vlorës dhe do fitojnë para. Ndërsa qytetarët shqiptarë do të paguajnë përreth 60 milionë euro për ndërtimin me koncesion të portit të ri të mallrave në zonën e Triportit.

Shehaj shton se tenderi për koncesionin e portit të mallrave është zhvilluar një ditë më parë. Klienti i radhës së qeverisë do të dalë ditët në vijim.

Shehaj: Tenderi për koncesionin e portit të mallrave është zhvilluar një ditë më parë. Klienti i radhës së qeverisë do të dalë ditët në vijim, duke përmbyllur kështu aferën e radhë, këtë herë me kosto të dyfishtë për qytetarët shqiptarë, të cilëve do u merret toka publike dhe do u ngarkohet fatura prej rreth 60 milionë euro. Është më se e drejtë që zona ku ndodhet porti të rikualifikohet dhe modernizohet, por jo nëpërmjet tjetërsimit të pronës publike, pa garë dhe në mënyrë korruptive. Shqipëria është e varfër sepse është një nga vendet më të korruptuara në Evropë. Vetëm një qeveri e pakorruptuar mund të sjellë mundësi dhe mirëqenie për të gjithë, jo vetëm për disa.