Shtohen rastet e shtrimeve nga Covid, në spital edhe pacientë të vaksinuar me dy doza
Nga Anxhela Celibashi Përditësimi i fundit 13 Shtator 2021, 14:22
Situata në vendin tonë vijon të jetë shqetësuese.
Mbi 800 persona raportohen të prekur me koronavirus pothuajse çdo ditë dhe shifrat e të shtruarve në spitale janë të larta.
Gazetarja e Ora News, Anxhela Celibashi thotë se në spital ka pacientë që i kanë bërë të dyja dozat e vaksinës, megjithatë kanë nevojë për trajtim mjekësor.
Sipas burimeve nga institucionet shëndetësore ka pasur humbje jete edhe te personat që kanë kryer të dyja dozat e vaksinave.
Sipas ekspertëve kjo ndodh, sepse personat mund të kenë marrë dozën e dytë të vaksinës me vonesë, ose për shkak të sëmundjeve bashkëshoqëruese.
Megjithatë një pjesë e madhe e të shtruarve janë të pa-vaksinuar.
Në spitalin infektiv sipas raportimeve të familjareve është e shtruar dhe një 30 vjeçare shtatzëne, e cila po merr trajtimin e nevojshëm.
Në 24 orët e fundit 175 persona janë të shtruar dhe po marrin shërbimin e nevojshëm mjekësor në spitalin infektiv dhe në spitalin Covid 3. 15 nga pacientët janë në gjendje të rëndë shëndetësore.
Me gjithë përpjekjet e mjekëve, dje nuk e kanë fituar betejën me COVID19 4 qytetarë: një qytetare nga Tirana 65 vjeçe, një qytetar nga Kolonja 65 vjeç, një qytetar nga Shkodra 78 vjeç dhe një qytetar nga Fieri 82 vjeç.
