Pogradeci “bashkon” Ballkanin, “Liqeni im” i Gjergj Xhuvanit çel festivalin e filmit
Nga Iris Rezhda Përditësimi i fundit 2 Shtator 2021, 13:59
Odeoni buzë liqenit në Pogradec është kthyer në kinema të hapur.
Aktorë, regjisorë e producentë nga i gjithë rajoni janë bërë bashkë aty për edicionin e 11 të festivalit Ballkanik të Filmit.
Filmi “Liqeni im” me skenar dhe regji nga Gjergj Xhuvani, që u nda nga jeta pak kohë më parë ishte përzgjedhur mes 35 produksioneve në garë për të çelur konkurrimin.
"Filmi i Gjergjit padiskutim që ka lidhje me këtë festival, padiskutim që ka lidhje me Pogradecin, me Korçën, me këtë zonë sepse edhe filmi quhet "Liqeni im." Është xhiruar në zonën e Prespës po zëre se janë në të njëjtat ujëra," tha Eno Milkani, organizator i B3F.
Festivali rikthehet nën moderimin e aktores Ema Andrea pas një viti të vështirë mes pandemisë së koronavirusit, që goditi fort edhe jetën kulturore.
"Pandemia ka sjellë shumë dëme në jetën tonë sociale, politike por ndoshta e vetmja e mirë që solli është që njerëzit kuptuan se sa i rëndësishëm është arti në jetën e tyre. Në këtë rast përfshihet edhe ekzistenca e këtij festivali. Është i rëndësishëm për zhvillimin e artit të vërtetë," tha Andrea.
Aktorja Tinka Kurti, regjisori Piro Milkani, Mevlan Shanaj etj., do të jenë në ditët e festivalit, ndërsa filmat garues do të vlerësohen nga një juri profesionistësh.
/OraNews/
