Rama: Duhet të jemi më prezent në Prishtinë, s’është asnjë sekret që marrëdhënia me ta nuk shkon vaj
Nga OraNews Përditësimi i fundit 27 Gusht 2021, 19:52
Kryeministri Rama gjatë fjalës së tij në mbledhjen me deputetë të rinj dhe të vjetër të Partisë Socialiste, ka pranuar sërish se me qeverinë e Kosovës, e cila në krye ka Albin Kurtin, gjërat nuk shkojnë vaj.
Rama thekson se mosdakordësia për “Ballkanin e Hapur”, ku Prishtina ka dalë kundër, ka marrë një peshë të pamerituar.
Pavarësisht kësaj Rama shprehet se me durim do punojmë me qeverinë e Kosovës për projektet mes dy vendeve.
“Duhet të jemi më prezent në Prishtinë, e kam fjalën si deputet, për të ndarë opinione, për të zhvilluar ide në interes të dy shteteve tona dhe i ftojmë ata të jenë të pranishëm në mjediset e Kuvendit në Tiranë. Nuk është sekret me që me qeverinë e Kosovës, gjërat nuk shkojnë vaj, dhe mosdakordësia për “Ballkanin e Hapur”, ka marrë një peshë të pamerituar në këtë mes. Por Kosova është pjesë e pandashme e jona dhe e të ardhme sonë të përbashkët.
E ardhmja do të na bashkojë gjithmonë e më shumë, prandaj ne do të punojmë me përkushtim që me qeverinë e Kosovës të kemi marrëdhënie vëllazërore, duke u fokusuar në gjithë atë punë e drejtime të cilat nuk kanë sesi të mos na bashkojnë dhe patjetër duke trajtuar me durim mosdakordësinë për “Ballkanin e Hapur”, që është një zgjedhje e drejtë dhe kuptimplotë për të ardhmen e këtij vendi dhe rajoni. Sa më shumë të ndërveprojmë sa më shumë të përfitojmë, aq më shumë do të zhvillohemi dhe të forcohemi. Do punojmë shumë fort."- shprehet Rama.
