OSBE/ODIHR publikon raportin final për 25 prillin: PS kishte avantazh, keqpërdorim me fondet dhe patronazhistët
Nga OraNews Përditësimi i fundit 26 Korrik 2021, 20:21
OSBE/ODIHR ka publikuar raportin final për zgjedhjet parlamentare të 25 prillit.
Sipas raportit të publikuar nga OSBE, partia në pushtet ka pasur avantazh gjatë gjithë kohës së votimeve.
”Partia në pushtet pati avantazh duke përfshirë kontrollin e administratave lokale, dhe keqpërdorimin e burimeve administrative.” - thuhet në raport.
Në raport vihet re se pretendimet për blerje votash ishin prezente gjatë fushatës dhe kjo pasoi me një numër të lartë hetimesh.
Po ashtu në raport thuhet ndër të tjera se "pretendimet për blerjen e votave nga partitë politike ishin përhapëse gjatë fushatës dhe një numër i lartë e hetimesh nisi në këtë drejtim. Në një numër të kufizuar të qendrave të votimit dhe numërimeve të vëzhguara, procesi ishte kryesisht transparent dhe i qetë. Praktikat e përhapura të blerjes së votave, siç pretendohet, mbetën një problem”.
OSBE-ODHIR thekson se presioni mbi nëpunësit civilë ishin fusha shqetësuese.
Në raport përmendet edhe databaza me të dhënat personale të mbi 900 mijë qytetarëve me preferencat e tyre për votimin ne 25 prill.
“Gjatë fushatës, u publikua një bazë të dhënash që përmban informacionin personal dhe detajet e kontakteve të rreth 900,000 shtetasve shqiptarë, që përmbajnë gjithashtu preferenca të mundshme të votimit. Partitë opozitare, Presidenti dhe shumë media kërkuan një hetim nga SPAK në keqpërdorimin e pretenduar të të dhënave personale të qytetarëve nga Partia Socialiste. Shpërndarja ose ndërthurja e paautorizuar e të dhënave personale të votuesve për qëllimet e supozuara të angazhimit demokratik mund të konsiderohet një shkelje e angazhimit për mbrojtjen e të drejtës për jetën private dhe familjare. Mund të dëmtojë besimin e elektoratit, përfshirë fshehtësinë e votës së tyre” – thuhet në raport.
Dokumenta bashkëngjitur
