Durrës, i shpërthen goma e kamionit duke e ndërruar, vdes 20-vjeçari
Nga Mark Brunga Përditësimi i fundit 6 Korrik 2021, 09:28
E nisi ditën duke punuar, si çdo ditë tjetër në dy viteve të fundit, por e marta e 6 korrikut rezultoi fatale për 20 vjeçarin Rafael Tafa.
I riu nga Burreli, që jetonte e punonte në zonën e Kënetës në Durrës, humbi jetën tragjikisht, pasi goma e këtij kamioni shpërtheu, duke e hedhur atë disa metra më tutje.
Rafaeli punonte në gomisterinë e lagjes 14 në Kënetë, e cila ndodhet rreth 6 kilometra nga qendra e qytetit.
Ngjarja tragjike ndodhi rreth orës 08:50.
Nuk është qartësuar shkaku i shpërthimit të gomës së automjetit të tonazhit të rëndë.
Sipas informacioneve jozyrtare nga mjekët mësohet se Rafael Tafa, ka ndërruar jetë rrugës për në Spital, ndërsa banorët e zonës që kanë qenë prezent në momentin e shpërthimit kanë hedhur akuza, duke thënë se ambulanca është vonuar.
"Ambulanca ka vonuar 40-45 minuta. Policia ka vonuar 15 minuta mos them më tepër. Ne ishim në kafe lart, nuk e pamë ne. Kemi dëgjuar zhurmën se ishte bërë mjegull. Kur kemi zbritur poshtë kemi parë çunin që ishte i përplasur pas hekurave," thotë banori.
20 vjeçari që mbeti viktimë gjatë incidentit në punë, ishte djalë i vetëm i familjes Tafa nga Burreli.
''Më datë 06.07.2021, rreth orës 08:50, në lagjen nr. 14/1, Kënetë, në ambientet e një gomisterie, duke rregulluar një gomë të një kamioni e cila ka shpërthyer, është lënduar shtetasi Rafael Tafa, 20 vjeç, (punonjës), i cili si pasojë e plagëve të mara ka ndërruar jetë.'' - njofton policia.
