Masakra në Velipojë/ E ëma mësoi për vrasjen e Musaenit 10 orë më pas
Nga OraNews Përditësimi i fundit 28 Qershor 2021, 19:33
Musaeni mbeti i vrarë nga breshëria e plumbave midis Ferracakëve dhe Gocajve, gjatë konfliktit për plazhin në Velipojë.
Ngjarja që ndodhi pak pas mesnatës, rreth orës 00:30 së 27 qershorit u përhap me shpejtësi në media dhe tronditi shoqërinë paraditen e së dielës. Atë mëngjes Anila, mamaja e Musaenit ishte nisur në punë si zakonisht në lavanderinë e spitalit të qytetit.
"Kam lare çarçafët e tu me gjak e nuk e kam ditë" dëgjohej të përsëriste në vajin e të birit.
Lajmin e kobshëm e mësoi rreth orës 11:00 të paradites së të dielës. Fillimisht policia e identifikoi si Myzerim Zeneli, 20 vjeç një ditë më pas u mësua se djaloshi i cili humbi jetën ishte Musaeni vetëm 19 vjeç.
Të premten e 26 qershorit Musaeni kishte mbrëmjen e maturës. Nga shokët ishte ndarë më herët pasi të nesërmen do të niste punë si kamarier pa e ditur që do të ishte dita e fundit e jetës së tij.
Ëndrra e Musaenit ishte të bëhej kuzhinier, por ajo mbeti vetëm e tillë. Historia e 19-vjeçarit që e veshi vetëm një ditë uniformën e bardhë i ka prekur të gjithë.
