Atentat armë zjarri në Tepelenë, humb jetën 45-vjeçari
Nga OraNews Përditësimi i fundit 1 Qershor 2021, 22:05
Të shtëna me armë zjarri janë regjistruar mbrëmjen e sotme në Tepelenë, ku për pasojë ka humbur jetën një 45-vjeçar. Ora News, mëson se ka mbetur i vdekur Çajup Selimi, i cili u qëllua me pistoletë në mes të qytetit.
Burime bëjnë me dije se Selimi, është pronar i një biznesi në Tepelenë, sakaq dyshohet se shkak i vrasjes mund të jetë konkurenca mes bizneseve.
Autori është larguar nga vendngjarja, ndërkohë që Ora News mëson se ai është i fshehur në një pallat në qytetin e Tepelenës.
"Rreth orës 21:15 në qytetin Tepelenës, në lagjen "15 Shtatori", në rrethana ende të paqarta është plagosur me armë zjarri shtetasi Ç.S., rreth 45 vjeç, i cili ka humbur jetën në Spitalin Rajonal Gjirokastër si pasojë e plagëve të marra."- njofton policia.
Menjëherë shërbimet e Komisariatit të Policisë Tepelenë dhe Forcat Shqiponja të DVP Gjirokastër kanë shkuar në vendngjarje dhe po krehin zonën për kapjen e autorit.
Ndërkohë janë ngritur disa pika kontrolli në hyrje dhe dalje të qytetit Tepelenë.
Grupi hetimor nën drejtimin e Prokurorisë ndodhet në vendngjarje dhe po punon për identifikimin dhe kapjen e autorit/ve
