"Nga këndvështrimi rilindas Presidenti është për t'u pushkatuar", Hoxha: Fati i Metës në dorë të Kushtetueses

Nga Besjana Kuçana Përditësimi i fundit 28 Maj 2021, 21:54


Komisioni parlamentar hetimor i kryesuaR nga mazhoranca miratoi sot relacionin ku i kërkon Kuvendit shkarkimin e Ilir Metës si president.

Analisti, Artan Hoxha, duke e cilësuar një raport gajasës të një parlamenti gajasës, thotë se tashmë fati i presidentit është në dorën e Kushtetueses.

Sipas tij, mbetet për tu parë nëse institucioni më i lartë gjyqësor është apo jo një mashë në duart e pushtetit të Rilindjes.

Hoxha: Presidenti i Republikës nga ana ligjore është në dorën e Gjykatës Kushtetuese. Kjo gjykatë do të shqyrtojë kërkesën që do të bëhet nga parlamenti pas miratimit të sigurt të një raporti gajasës, të një parlamenti gajasës. Do të jetë Gjykata Kushtetuese që ne e dimë sesi është formësuar deri tani brenda kuadrit të ashtyquajtur reformë në drejtësi. Do të shohim nëse kjo gjykatë do të jetë e aftë të marrë një vendim  të mënçur apo do të konstatojmë se edhe kjo gjykatë ka rënë në kthetrat e Rilindjes dhe është shndërruar në një mashë për ta.

Për Rtv Ora, me gazetaren Beti Njuma, Hoxha vlerëson se qëndrimi që kjo gjykatë mbajti në rastin e dekretimit të ministrave nga presidenti është pozitiv.

Hoxha: Ai qëndrim lidhur me një nga ministrat është një parathënie pozitive për gjykatë, por është një dispozitiv i pjesshëm, do të doja të lexoja me shumë kureshtje profesionale vendimin e plotë të gjykatës. Gjykata Kushtetuese vlerësohet më shumë për argumentat sesa për dispozitivin. Janë argumentat e saj që shërbejnë si doktrinë dhe shpjegim ligjor.

Mazhoranca ka renditur në raport 19 deklarata publike, 45 postime në rrjetet sociale dhe intervistat në mediat televizive si motivacion për largimin nga detyra të Metës.

Por a janë këto qëndrime aq të rënda sa për të legjitimuar shkarkimin e tij?

Hoxha: Ka dy momente. Nga këndvështrimi rilindas po, presidenti është jo vetëm për tu shkarkuar por për tu pushkatuar. Por nëse presidenti u shkarkoka për terminologjinë e përdorur që i duket e rëndë Rilindjes, nuk do të mbetet njeri në këmbë. Kemi të bëjmë me një parlament qesharak, komision qesharak dhe realacion qesharak.Ky parlament ishte i paqenë që kur u largua opozita dhe u bë dyfish i paqenë pas zgjedhjeve të 25 prillit.Si mund të vazhdohet me një komision të tillë që kërkon në seancë plenare 2/3 që do të merret vendimi me një tufë karagjozësh të mbetur tashmë në fazën më karagjoze të këtij parlamenti. Si mund ta marrim seriozisht? Uroj që Gjykata Kushtetuese ti rezistojë presionit për tu bërë një vegël tjetër e këtij regjimi.

Partisë Socialiste do t’i duhen 94 vota në Parlament për ta çuar deri në fund vullnetin e saj për shkarkimin e Metës, duke u bërë në këtë mënyrë precedenti i parë në historinë e pluralizmit.

Të hënën Konferenca e Kryetarëve do të marrë vendim nëse raporti do të votohet në 3, 10 apo 17 qershor.

Pas vendimit politik të Parlamentit, fati i Ilir Metës do të jetë në dorën e interpretimit të 7 anëtarëve të Gjykatës Kushtetuese.