Harrohet pandemia, bashkia Elbasan 33 milion lekë dekor për Ditën e Verës
Nga OraNews Përditësimi i fundit 12 Mars 2021, 11:36
Këto lule artificiale janë pjesë e dekorit për ditën e verës dhe do tu kushtojnë qytetarëve 3.3 milionë lekë të reja sipas tenderit të Bashkisë Elbasan drejtuar nga Glendian Llatja.
Përtej vlerës së shpenzimeve që konsiderohet e lartë në një kohë të vështirë, dekori është zhgënjyes për banorët në qytetin e luleve.
"E mira që të jenë natyrale," thotë një qytetar.
"Reale, ne kështu jemi mësuar," thotë një tjetër.
"Natyrale, ç'i do ato,"thotë një zonjë.
Dita e Verës nga ana tjetër rrezikon të kthehet në festën e virusit Covid në Elbasan.
Kjo pasi Bashkia e Drejtuar nga Gledian Llatja ka vendosur të sfidojë pandeminë dhe të organizojë festime në një kohë kur grumbullimet mbi 10 persona janë të ndaluara.
"Do të ketë një treg agro-ushqimor dhe zejtar përgjatë murit të kalasë, gjithashtu në portën e Kalasë do të pozicionojmë një ekspozitë të piktorëve më të mirë të qytetit me veprat e tyre të përzgjedhura, veprat më të mira,"thotë nënkryetarja e bashkisë Elbasan.
Vartësit e Llatjes thonë se do të nxjerrin policinë bashkiake për të garantuar zbatimin e protokolleve, por kjo do të jetë një sfidë e vështirë.
"Kemi një grup të sigurisë i cili do të përkujdeset në çdo detaj të këtyre aktiviteteve," thotë ajo.
Veç shpenzimeve për dekor, bashkia e Drejtuar nga Gledian Llatja, ka menduar që të shpenzojë edhe 791 mijë lekë për blerjen e fishekzjarreve, ndërsa 20% e tyre do të dorëzohen me datën 13 mars.
