Kryebashkiaku i Elbasanit, Gledian Llatja në SPAK/ PD: Ktheu lulishtet në kulla
Nga OraNews Përditësimi i fundit 2 Shkurt 2021, 13:12
Ndërtimi i disa kullave në lulishten pranë Bashkisë, nëpërmjet një kontrate të Partneritetit Publik Privat, do ta përballë kryebashkiakun e Elbasanit Gledjan Llatja, me prokurorinë special kundër krimit dhe korrupsionit. Padia është bërë nga Partia demorkatike e cila argumenton se Kryebashkiaku i Elbasanit ka favorizuar kompaninë private, duke shkaktuar një dëm prej 8.3 milion euro.
Partia Demorkatike nëpërmjet Sekretarit të Përgjithshëm Gazment Bardhi, ka kallëzuar në SPAK Kryetarin e Bashkisë Gledjan Llatja, me akuzën për “shpërdorim të detyrës”. Padia vjen për kontratën e partneritetit publik privat që i mundëson një kompanie private ndërtimin e Kullave në lulishten pranë Bashkisë së Elbasanit. Sipas Partisë Demokratike, Kryetari i Bashkisë Elbasan, ka favorizuar kompaninë private, duke falur tokë publike.
“Nëpërmjet veprimeve dhe mosveprimeve të paligjshme, Kryetari i Bashkisë Elbasan, ka dëmtuar interesin publik, duke i shkaktuar një dëm të madh ekonomik Bashkisë Elbasan, në të paktën 8.3 milion euro, duke konsumuar elementët e veprës penale “shpërdorim i detyrës”
Në kallëzimin penal, thuhet konkretisht se nga zbatimi i kontratës së partneritetit publik privat Bashkia po përfiton vetëm 2648 m2 sipërfaqe të re ndërtimi, ndërkohë që duhet të kishte përfituar 14 560 m2. Në këtë mënyrë, argumentohet se institucioni i Bashkisë ka humbur një sipërfaqe prej 11, 912 m2, ose rreth 8.3 milion euro.
