Skandali "Dede" te Tirana, Bulku: Klubi u tregua jo i sinqertë. Halili nuk duhej të përfshihej
Nga OraNews Përditësimi i fundit 26 Janar 2021, 18:21
Në një intervistë me Skype për emisionin “Sport Magazine” në Ora News, ish futbollisti i njohur i Tiranës, Sokol Bulku, ka komentuar situatën e pazakontë që po kalon klubi bardheblu pas largimit të trajnerit Nevil Dede.
Sipas ish mesfushorit, klubi i Tiranës nuk është treguar i sinqertë me deklaratat, ndërsa shtoi se presidenti Refik Halili nuk duhej të përfshihej në debat pasi përgjegjësitë duhej ti merrte drejtori sportiv, në këtë rast Tefik Osmani.
Sokol Bulku: “Po ta shikosh dhe po ta dëgjosh çfarë na është servirur në media, po të nxitohesh do të arrish në një konkluzion të gabuar. Për mendimin tim, këtu kemi një përplasje të dy institucioneve, të klubit dhe të trajnerit. Që të dyja palët kanë një objektiv të përbashkët: të ecë puna mirë.
Unë mendoj se deklaratat e klubit nuk janë shumë të sinqerta. Kur flas për klubin nuk flas për presidentin. Flas për gjithë strukturat që e përbëjnë klubin. Unë di që para ndeshjes Drejtori Sportiv ka nxjerrë me urdhërin e tij 12 lojtarë në fushën për të bërë nxemjen. Ndërkohë trajneri ka nxjerrë 11 lojtarë në fushë. Unë kam qenë edhe lojtar, edhe pjesë e stafit të Tiranës. Unë di që dalin 11 lojtarë. Dhe nëse dalin 12 veta atëherë është një lojtar që mund të jetë i dëmtuar por që pret ok-in gjatë nxemjes.
Ti nuk mund të ndërhysh ditën e ndeshjes. Prandaj them klubi nuk është treguar shumë i sinqertë. Se drejtori sportiv nga dita e premte në ditën e dielë është përgatitur ndeshja anti-Laç, pa derbit dhe gjatë këtyre tre ditëve drejtori sportiv mund të komunikojë me trajnerin për ndonjë lojtar. Pra, presidenti nuk duhej përfshirë fare në këtë temë. Ka drejtorin sportiv. Drejtori sportiv duhet të mbante përgjegjësinë dhe ta çonte deri në fund veprimin që ka bërë".
Lexo edhe:
Largimi i Nevil Dedes, Dabulla për “Sport Magazine”: Situatë e pazakontë, Tirana do e vuajë
