OFL, sukses? Gazetarja: Të të vijë turp, pse nuk ka formular për ish-ministrin Tahiri dhe Agron Xhafaj? Lleshaj: Më zure ngushtë...
Nga OraNews Përditësimi i fundit 4 Dhjetor 2020, 08:09
Puna e Operacionit Forca e Ligjit përplasi në debate të ashpra mbrëmjen e kaluar gazetaren Klodiana Lala dhe Ministrin e Brendshëm Sandër Lleshaj.
Ministri Lleshaj foli me superlativa për rezultatet e OFL, por nuk ndau të njëjtin mendim me të gazetarja sipas të cilës sot rezultojnë vetëm 100 pasuri të sekuestruara nga OFL.
Nga ana tjetër ajo i kërkoi llogari Ministrit se pse OFL nuk u ka dërguar formularin e vetëdeklarimit të pasurisë ish-ministrit të Brendshëm Saimir Tahiri dhe vëllait të ish-ministrit tjetër të Brendshëm Fatmir Xhafaj.
Pjesë nga debati në emisionin "Opinion"
Lleshaj: Nuk merrem me emra. Si mund të merrem me ish-ministrin e Brendshëm unë?
Lala: Është selektive zoti ministër? Mund të jeni më i qartë?
Lleshaj: Pse fakti që nuk merrem me emra do të thoë që jam selektiv?
Lala: Na sqaroni pse mungon sepse OFL-së i përfundon afati në 31 dhjetor.
Lleshaj: OFL ka një kategori subjektesh qartësisht të përcaktuara nga ligji. Janë persona të dënuar për 31 nene të kodit penal.
Lala: Edhe nën hetim zoti ministër sepse ju përmenda raste konkrete dhe mund ta hapim ligjin që ta konsultojmë.
Lleshaj: Janë vepra penale të caktuara. Ti mendon se unë do të shkoj të interesohem se çfarë bën policia për ish-ministrin e Brendshëm?
Lala: Po atëherë mos hajdeni fare në studio, nëse nuk keni për të thënë edhe mbaroi. OFL nisi si një aksion i madh i trumbetuar nga ju dhe nga kryeministri…
Lleshaj: Dhe i suksesshëm shumë!
Lala: Duhet të të vijë turp që e thua këtë gjë!Duhet të skuqesh para shqiptarëve kur e thua këtë gjë.
Lleshaj: Ti je grua dhe zonjë dhe më çarmatos. Më ke zënë ngushtë se nuk të përgjigjem dot me të njëjtën gjuhë. Si thua s’ke turp?
