Luajti dhe shënoi kundër Kosovës, futbollisti i Moldavisë rezulton me Covid-19 pas ndeshjes
Nga OraNews Përditësimi i fundit 5 Shtator 2020, 14:12
Kombëtarja e Moldavisë është tronditur nga lajmi se futbollisti i saj Ion Nikolaçesku ka rezultuar pozitiv në testin për Covid-19 pas barazimit 1-1 me Kosovën mbrëmjen e 3 shtatorit.
Lajmi bëhet i ditur nga “Telegrafi”, i cili ka marrë konfirmimin nga presidenti i Federatës së Futbollit të Kosovës Agim Ademi se është njoftuar nga UEFA për rastin në fjalë.
Ai shtoi se FFK-ja do të respektojë çdo vendim të qeverisë së futbollit europian.
“Po, sapo na erdhi informacioni nga UEFA se sulmuesi i Moldavisë , i cili ka shënuar gol ka rezultuar pozitiv me COVID-19 në testin e bërë pas ndeshjes. Vlen të theksohet se ai para ndeshjes e ka pasur testin negativ dhe atë dëshmi e ka lojtari dhe UEFA'', u shpreh presidenti i FFK-së Agim Ademi.
Tashmë ekziston frika se 21-vjeçari Nikolaçesku mund të ketë infektuar dhe shokët e skuadrës.
