Opozita pranon kërkesën e PS për Këshillin Politik: Marrëveshja të miratohet sa më parë dhe pa asnjë ndryshim

Nga OraNews Përditësimi i fundit 17 Korrik 2020, 19:18

Partia Demokratike dhe Lëvizja Socialiste i është përgjigjur ftesës së Partisë Socialiste për mbledhjen e Këshillit Politik, për të diskutuar për ndryshimet kushtetuese.

Përfaqësuesit e opozitës Oerd Bylykbashi dhe Petrit Vasili, kanë bërë të ditur përmes një reagimi, se mirëpresin reflektimin e mazhorancës lidhur me këtë çështje, dhe se konfirmojnë pjesëmarrjen e tyre në mbledhje.

Sipas tyre, dokumenti i depozituar nga një grup deputetësh të mazhorancës dhe që përmban produktin e dakordësuar në Tryezën e Këshillit Politik , duhet të miratohet sa më parë dhe pa asnjë ndryshim.

Ata shprehen gjithashtu, se nëse zgjerohet formati i përbërjes së Këshillit Politik, Opozita e Bashkuar, do të përfaqësohet edhe nga Sekretari i Përgjithshëm i PD-së, Gazment Bardhi.

Përgjigja e përfaqësuesve të opozitës që konfirmon pjesëmarrjen në Këshillin Politik

I nderuar koleg,

Në emër të opozitës, mirëpresim reflektimin tuaj për të vijuar diskutimin dhe vendimmarrjen konsensuale në Këshillin Politik për çdo çështje lidhur me zgjedhjet, siç kemi rënë dakord me shkrim në Marrëveshjen Politike të 14 Janarit dhe Dakordësinë e 5 Qershorit.

Paraprakisht ju konfirmojmë se dokumenti i depozituar nga një grup deputetësh të mazhorancës dhe që përmban produktin e dakordësuar në Tryezën e Këshillit Politik (siç ju rikonfirmoni me e-mail më sipër) duhet të miratohet sa më parë dhe pa asnjë ndryshim, dhe për këtë arsye, nuk mund të rihapet asnjë çështje që është dakordësuar aty.

Për çdo çështje tjetër, ne jemi të gatshëm, në orën e caktuar nga ana juaj, si të hënë ashtu edhe të martën, pa patur një preferencë për këtë. Presim konfirmimin tuaj për ditën që ju preferoni, duke shprehur gatishmërinë tonë për pjesëmarrjen në atë mbledhje.

Në lidhje me ndryshimin e formatit të përbërjes së Këshillit Politik, nëse ju keni vlerësuar si të përshtatshme zgjerimin e përfaqësuesve të partive politike në Grupin e Punës së Këshillit Politik, atëherë ju bëjmë me dije se Opozita e Bashkuar do të përfaqësohet përveç nesh, edhe nga Sekretari i Përgjithshëm i Partisë Demokratike z. Gazment Bardhi.

Mbetemi në pritje të konfirmimit të ditës nga ana juaj,

Me respekt,

Oerd Bylykbashi

Petrit Vasili

Lexo edhe: Kushtetuta rikthen Këshillin Politik, Gjiknuri: Të mblidhemi me 20-21 korrik, i pranishëm do jetë edhe Rama

Ndryshimet Kushtetuese, Meta kthen Bashën dhe Ramën në tryezë