Gëzuar Bajramin! Tirana sot në mëngjes
Nga OraNews Përditësimi i fundit 24 Shtator 2015, 12:22
Mijëra besimtarë ishin pjesë e festimeve dhe faljes së namazit të Bajramit. Ceremonia e Bajramit u organizua si çdo vit në bulevardin "Dëshmorët e Kombit", ku mijëra besimtarë ishin pjesë e festimeve dhe faljes së namazit të Bajramit.Ceremonia ka filluar me fjalën më të bukur, me këndimin e një pjese nga Kur'ani Famëlartë, të cilën e përcolli hafizi Enes Hyka.Nënkryetari i Komunitetit Mysliman të Shqipërisë, z. Bujar Spahiu, uroi besimtarët myslimanë dhe gjithë shqiptarët kudo që ndodhen për festën e Kurban Bajramit."Më lejoni që në këto çaste të gëzuara të festës së Kurban Bajramit, festës së sakrificës dhe përkushtimit, t'ju përcjell urimet e mia më të përzemërta, paqe, lumturi dhe gëzim sjelltë në familjet, miqtë dhe të afërmit tuaj. Sot është Kurban Bajrami, festa që simbolizon, sakrificën sublime të njeriut të përsosur, dhe shënjon kulmin e bindjes, besnikërisë dhe dashurisë ndaj Allahut të plotfuqishëm. Kuptimi i kurbanit dhe sakrificës në Islam, nuk qëndron në derdhjen e gjakut të një kafshe, por në aktin e bindjes", u shpreh nënkryetari Spahiu.
