Parlamenti grek miraton paketën e reformave për negociatat me kreditorët
Nga OraNews Përditësimi i fundit 11 Korrik 2015, 08:25
Me 251 vota pro dhe 32 kundër Parlamenti grek ka miratuar pak pas orës 03:00 të mëngjesit paketën e propozimeve te qeverisë greke për daljen nga kriza.Në një deklaratë të lëshuar gjatë natës, kryeministri grek Aleksis Tsipras tha se mbështetja e deputetëve i dha atij një "mandat të fortë për të përfunduar negociatat dhe për të arritur një marrëveshje të drejtë shoqërore dhe ekonomikisht të qëndrueshme.""Prioritet tani është që të ketë një rezultat pozitiv për negociatat. Çdo gjë tjetër në kohën e vet," tha ai.Seanca u shoqërua me debate të shumta mes përfaqësuesve të shumicës dhe opozitës. Ministri i Financave pranoi gjatë fjalës së tij në parlament se ky propozim nuk mund të shoqërohej me triumfalizëm pasi 61% e grekëve refuzuan propozimin e mëparshëm të kreditorëve.Edhe pse nuk ishte i pranishëm për të votuar si deputet, ish-Ministri i Financave Varufakis deklaroi për britaniken “ The Guardian” se Ministri gjerman i Financave dëshiron ta shohë Greqinë jashtë Eurozonës për ti futur frikën Francës dhe për të imponuar disiplinë.Votimi u krye ndërsa mijëra grekë qëndruan jashtë për orë të tëra duke protestuar kundër propozimeve të bëra nga qeveria Tsipras ndaj kreditorëve ndërkombëtarë.Përpara votimit, Kryeministri grek u tha parlamentarëve se ata kishin një "detyrë kombëtare për të mbajtur gjallë popullin e tyre.""Ne do të kemi sukses, jo vetëm për të qëndruar në Evropë, por për të jetuar si të barabartë me kolegët tanë, me dinjitet dhe krenari", tha Tsipras.Ai pranoi se propozimet e paraqitura kreditorëve ishin "larg nga premtimet” e bëra gjatë fushatës së tij zgjedhore kundër masave shtrënguese, por shtoi se ato ishin "pak më mirë" se propozimet e paraqitura nga kreditorët para referendumit.Paketa më e fundit për reforma është tepër e ngjashme me kushtet që grekët refuzuan në referendum të dielën e kaluar, duke zemëruar kështu anëtarët e plaftformës së majtë brenda partisë Syriza.Pesë prej tyre nënshkruan një letër ku thuhej se do të ishte më mirë të rikthehej dhrahmia, se sa të pranonin masa të mëtejshme shtrënguese pa marrë falje të borxhit.
