Luftime të ashpra në Siri
Nga OraNews Përditësimi i fundit 29 Tetor 2012, 12:15
Në ditën e fundit të armëpushimit të ndërmjetësuar nga i dërguari i OKB-së dhe ligës arabe kryeqyteti sirian Damask është bombarduar duke shkaktuar të paktën 14 të vrarë duke përfshirë gra dhe fëmijë. Sipas aktivistëve avionët kanë bombarduar zona të ndryshme në kryeqytet. Luftimet ndërmjet forcave të presidentit sirian Bashar al Assad dhe kryengritësve kanë vazhduar edhe në krahinën veriore Idlib."Armëpushimi praktikisht kurrë nuk ka ndodhur. Damasku ka qenë nën sulmet ajrore brutale dhe qindra njerëz janë arrestuar," tha një aktivist.Të dyja palët në konfliktin 19-mujore kanë shkelur armëpushimin për të shënuar festën e Kurban Bajramit. Autoritetet siriane fajësojnë terroristët për prishjen e armëpushimit ndërsa opozita thotë se një armëpushim është i pamundur në një kohë kur Assad përdor tanke dhe avionë kundër zonave të banuara.Në një deklaratë nga ushtria siriane theksohen shkeljet flagrante të rebelëve që sipas tyre duan të shkatërrojnë Sirinë.Brahimi shpreson t`i japë fund konfliktit që ka vrarë të paktën 32.000 persona dhe që ka rritur shqetësimet se mund të destabilizojë Lindjen e Mesme, ndërkohë që sot pritet të takojë ministrin e jashtëm rus Sergei Lavrov për të gjetur një zgjidhje për krizën.
