Nishani takim me gratë deputete, shqetësim për dhunën në familje
Nga OraNews Përditësimi i fundit 23 Janar 2015, 16:54
Presidenti, Bujar Nishani, gjatë së premtes zhvilloi një takim me një grup përfaqësues të "Aleancës së Grave Deputete", për t'u konsultuar e diskutuar lidhur me nismën e tyre për një aksion kombëtar kundër dhunës me bazë gjinore.Të alarmuara nga rritja e numrit të krimeve ndaj grave dhe dhunës në familje Aleanca e Grave Deputete synon së pari sensibilizimin e të gjithë opinionit publik, dhe së dyti një monitorim më të rreptë ndaj zbatimit të ligjit nga institucionet përgjegjëse.Kryetarja e Aleancës, Mesila Doda, gjatë takimit vlerësoi angazhimin e Presidentit Nishani, i cili i shërben ngritjes së kësaj çështjeje në nivel edhe më të lartë dhe të merituar.Nishani premtoi se do ta trajtojë me përparësi publikisht dhe institucionalisht këtë çështje, përfshirë në cilësinë e tij si Kryetar i Këshillit të Lartë të Drejtësisë, duke bërë me dije se ka kërkuar takim të posaçëm me Prokurorin e Përgjithshëm pikërisht për këtë temë, si dhe faktin se do të verë menjëherë në lëvizje edhe më dinamike KLD-në për inspektimin tematik të Gjykatave për vitet 2013-2014, në trajtimin e çështjeve të dhunës në familje dhe mbi bazë gjinore.
